Тошкент шаҳар ҳокимияти матбуот хизмати хабарига кўра, Кичик ҳалқа автомобиль йўлидан эски ТошМИ ёнидаги Махтумқули кўчасига чиқиш йўлини реконструкция қилиш ишлари якунланди.
Шаҳар маъмурияти томонидан эълон қилинган видеода янги йўл ҳаракати ташкил этилгани акс этган. Махтумқули кўчасидан Кичик ҳалқа йўлига кириш энди темир йўл ва автомобил кўприклари остида ўтгандан сўнг, ўнгга бурилиш орқали амалга оширилади. КХЙга чиқишда эса ҳам ўнгга, ҳам чапга бурилиш (светофор орқали) имкони мавжуд. Аввал мавжуд бўлган Махтумқулидан Кичик ҳалқа йўлига чапга бурилиш йўли ёпилди.
Кичик ҳалқа йўлидан эски ТошМИ (шаҳар маркази) томон тушиш йўли эса аввалгидек йўл ўтказгич олдидан эмас, балки ундан олдин бошланади.
“Тошкент инвест” компанияси мутахассислари, халқаро экспертлар билан ҳамкорликда, транспорт оқимини ўлчаб, ўрганиб ва таҳлил қилиб чиқди. Мазкур иншоотнинг муҳандислик ва техник ечими шаҳар ГУБДД ва China Construction билан ҳамкорликда ишлаб чиқилган”, — дейилади хабарда.
“Ҳудуд пиёдалар эҳтиёжларини ҳисобга олган ҳолда ободонлаштирилмоқда, ногиронлиги бўлган шахслар учун қўшимча қулайликлар яратилган”, — дейилади хабарда. Ҳокимият видеосида пиёдалар чиқиш йўлларидан бирининг четида ҳаракатланаётгани кўринади.
Чиқиш йўлларини реконструкция қилиш 2024 йил кузида бошланган.
