Ўзбекистонда кибержиноятчиликка қарши кураш чоралари кучайтирилади. Тегишли қарор Ўзбекистон президенти томонидан 30 апрелда имзоланди, деб хабар берди Адлия вазирлиги матбуот хизмати.
Ички ишлар вазирлиги киберхавфсизликка қарши курашиш соҳасида ваколатли орган этиб тайинланди. Кибержиноятларнинг очилиш даражасини ошириш мақсадида ушбу жараёнда қонунчиликка риоя этилиши устидан прокурор назорати ўрнатилади.
Ҳужжатга кўра, жиноят содир этишда ахборот технологияларидан фойдаланиш энди оғирлаштирувчи ҳолат ҳисобланади.
Бундан ташқари, ўз банк карталари, ҳисоб рақамлари, электрон ҳамёнлари ёки шахсий маълумотларидан (SIM-карталар, электрон аккаунтлар) кибержиноятлар содир этиш учун фойдаланишга йўл қўйган шахслар учун маъмурий ва жиноий жавобгарлик чоралари жорий этилмоқда.
Марказий банк томонидан “молиявий пирамида” каби фирибгарлик схемаларининг белгиларини аниқлаш тизими жорий этилмоқда, — деди Марказий банк раиси ўринбосари Содир Мелибаев “Ўзбекистон 24” телеканалига берган интервьюсида. — Ички ишлар вазирлиги, Бош прокуратура ва Марказий банк ўртасида маълумот алмашинувининг электрон платформаси ишга туширилади. Банк сирини ташкил этувчи маълумотларни йиғиш жараёни тўлиқ автоматлаштирилади. Прокурор санкциялари электрон шаклда олинади. Бундан ташқари, оммавий ахборот воситалари ва интернет ҳамжамиятлари орқали аҳолининг молиявий саводхонлигини ошириш бўйича ишлар режалаштирилган.
Қолаверса, Марказий банк 2025 йилнинг 1 сентябрига қадар барча банклар ва кредит бюролари маълумотларини ягона платформага интеграция қилишни якунлайди ва марказлашган фирибгарликка қарши тизимни жорий этади.
Ҳужжатда, шунингдек, Рақамли технологиялар вазирлиги йил охиригача сохта қўнғироқларни чеклаш тизимларини жорий этиши кўзда тутилган. Қарорга кўра, шубҳали пул ўтказмаларига алоқадор бўлган банк карталарини тезкор блоклаш имконияти яратилади.
Ҳар ойда ахборот тизимларидаги заифликлар туфайли кибержиноятларга йўл қўйган банклар ва тўлов ташкилотларининг рўйхати эълон қилиб борилади. Агар ушбу жиноятлар банклар ёки тўлов операторлари томонидан ахборот ва киберхавфсизлик талабларига риоя қилмаслик оқибатида содир этилган бўлса, улар фойдаланувчиларга етказилган зарарни қоплашга мажбур бўладилар.
Ноябрь ойида “Кибермаданиятни ошириш ойлиги”ни ўтказиш режалаштирилган. Ушбу даврда интернет ва ижтимоий тармоқларда киберфирибгарликнинг янги усуллари ҳақида огоҳлантирувчи мақсадли рекламалар ишга туширилади.
Яқин вақт ичида Ахборот технологияларидан фойдаланган ҳолда содир этилган жиноятларга қарши курашиш тўғрисидаги қонун лойиҳаси ишлаб чиқилиб, қабул қилинади, — деди Ўзбекистон Республикаси Олий Мажлиси Қонунчилик палатасининг Инновацион ривожланиш ва ахборот технологиялари масалалари қўмитаси раиси Илҳом Абдуллаев “Ўзбекистон 24” телеканалига берган интервьюсида. Унинг таъкидлашича, бу борада қонуности ҳужжатлари доирасида ишланмалар мавжуд, шунингдек, халқаро тажриба ўрганилиб, миллий хусусиятлар таҳлил қилинган.
