Таиланд-Жанубий Корея йўналиши бўйича ҳаракатланаётган Boeing 737 учоғи қўниш вақтида ҳалокатга учради. Ичида 175 йўловчи ва 6 экипаж аъзоси бўлган. Фақат икки киши қутқарилди, қолганлари ҳалок бўлди. Расман 179 кишининг вафот этгани тасдиқланган.
Жанубий Кореянинг Yonhap агентлиги хабар беришича, Jeju Air компаниясининг Boeing 737-800 самолети Бангкокдан учган. Сеулдан 288 км масофадаги Муан аэропортига қўниши чоғида самолёт учиш-қўниш йўлаги чегарасидан чиқиб кетиб, тўсиққа урилган.
Корея телевидениеси ҳодиса натижасида юзага келган кучли ёнғин кадрларини намойиш этди. Ёниб турган самолёт икки қисмга ажралиб кетган.
Ёнғин ўчириш хизматлари ҳодисадан сўнг қутқарув операциясини бошлади. Дастлаб 28 кишининг ҳалок бўлгани ҳақида хабар қилинган эди, бир неча соат ўтгач, қурбонлар сони 62 кишига етгани маълум қилинди. Миллий ёнғин хизмати деярли барча йўловчилар ва экипаж аъзолари ҳалок бўлганини билдирди. Охирги расмий маълумотларга кўра, 179 киши вафот этган.
Икки киши тирик қолди — улар йўловчи ва экипаж аъзосидан бири. Reutersнинг хабар қилишича, уларнинг ҳар иккаласи самолётнинг дум қисмидан топилган. Ҳозирда улар шифохонада.
Йўловчиларнинг катта қисми — 173 киши Жанубий Корея фуқароси, иккитаси эса Таиланд фуқароларидир.
Ҳодиса сабаблари ҳозирча номаълум. Дастлабки маълумотларга кўра, самолёт қушлар билан тўқнашув сабабли бошқарувни йўқотган бўлиши мумкин. Yonhap маълумотларига кўра, ушбу тўқнашув сабаб шасси бошқарув тизими ишламай қолган. Мамлакат ҳукуматининг иккинчи тахминига кўра, ҳодиса об-ҳаво шароити билан боғлиқ.
Ҳалокат сабабларини аниқлаш учун қора қути ёзувлари ўрганилади ва улар аллақачон топилгани маълум қилинди.
Жанубий Корея ҳукумати вакилининг айтишича, қўнишдан олдин ҳаво ҳаракатини бошқариш хизмати экипажни қушлар билан тўқнашув эҳтимоли ҳақида огоҳлантирган. Шу сабабли қўнишни кечиктиришга тўғри келган.
Тахминан икки дақиқа ўтгач, учоқ хавф сигналини берган, унга тескари йўналишдан қўнишга рухсат берилган.
Видеотасвирга кўра, самолёт шассисини чиқармасдан «қорнига» қўнган, учиш-қўниш йўлагидан ўтиб, деворга урилган ва портлаган.
Жанубий Корея Транспорт департаменти маълумотига кўра, самолёт бош учувчиси 2019 йилдан буён ушбу лавозимда ишлаб, 9800 соатдан ортиқ парвоз тажрибасига эга бўлган.
Jeju Air компанияси 2006 йилдан буён парвозларни амалга ошириб келмоқда. Компания тарихида бу биринчи қурбонлар билан боғлиқ ҳодисадир. 2007 йилда компания самолёти Кимхэ (Пусан) аэропортида учиш-қўниш йўлагидан чиқиб кетган. Ўшанда олти йўловчи енгил жароҳат олган.
Boeing компанияси ўз баёнотида шундай деди: «Биз Jeju Air компанияси билан 2216-рейс бўйича мулоқотдамиз ва ҳар қандай ёрдамни кўрсатишга тайёрмиз. Биз яқинларини йўқотган оилаларга чуқур ҳамдардлик билдирамиз ва бизнинг фикрларимиз йўловчилар ва экипаж билан бирга».
Jeju Air авиакомпанияси сайтида қора баннер жойлаштирилган бўлиб, унда: «Биз ушбу ҳодисадан жабр кўрган барчага ҳамдардлигимизни билдирамиз. Вазиятни ҳал қилиш учун барча чораларни кўрамиз», — дейилган.
