Жанубий Кореянинг собиқ президенти Юн Сок Ёль 2024 йил декабрида мамлакатда ҳарбий ҳолат жорий этишга урингани учун ҳокимиятни суиистеъмол қилишда айбланди, деб хабар берди Yonhap прокуратурага таяниб.
Агентликнинг қайд этишича, янги айбловлар ҳибсга олинмасдан эълон қилинган. Юн Сок Ёль аллақачон исён бўйича жиноят ишида айбланувчи сифатида ўтмоқда.
Прокурорлар дастлаб Юн Сок Ёлнинг президентлик дахлсизлиги туфайли ҳокимиятни суиистеъмол қилиш айбловини қўйишдан бош тортишган, аммо у импичмент натижасида лавозимидан четлаштирилганидан кейин айблов эълон қилишга қарор қилишди.
Прокуратура вакили терговда етарлича далиллар борлигини айтди ва ҳуқуқ-тартибот идоралари янги ишни исён иши билан бирлаштириш учун Сеул марказий округ судига мурожаат қилганини аниқлаштирди.
2024 йил 3 декабрда Юн Сок Ёль мамлакатда ҳарбий ҳолат жорий этишга муваффақиятсиз уринди. У ўз қарорини мухолифат ҳаракатлари туфайли конституциявий тузумни ҳимоя қилиш зарурати билан изоҳлади. Парламент фармонни блоклади ва президент уни бекор қилишга мажбур бўлди. Кейинчалик Юн Сок Ёль ва бошқа бир қатор мансабдор шахсларга нисбатан тергов бошланди, парламент эса иккинчи уринишда унга импичмент эълон қилди.
2025 йил апрель ойи бошида Жанубий Корея Конституциявий суди президентга импичментни тасдиқлади. Хан Док Су президент вазифасини бажарувчи этиб тайинланди, мамлакатда навбатдан ташқари президентлик сайловлари 2025 йил 3 июнда бўлиб ўтади.
Пайшанба куни Хан Док Су президентликка номзодини қўйиш учун истеъфога чиққани маълум бўлди, деб ёзади Yonhap.
“Бу қарор тўғрими ва бу муқаррарми деган узоқ ва пухта ўйлаганимдан сўнг, агар бу ягона йўл бўлса, мен ундан ўтишим керак деган қарорга келдим”, деди Хан Док Су.
