Швейцариянинг Муттенц шаҳридаги Федерал жиноий суднинг фавқулодда апелляция суди ФИФАнинг собиқ президенти Йозеф Блаттер ва УЕФАнинг собиқ раҳбари Мишель Платинини коррупция иши бўйича оқлади, деб хабар беради Reuters.
2022 йили Блаттер ва Платини қуйи суд томонидан оқланган эди, лекин Швейцария прокуратураси бу қарор устидан апелляция киритган.
«Иккита оқлов ҳукмидан кейин ҳатто Швейцария Бош прокуратураси ҳам бу жиноий ишларнинг буткул муваффақиятсиз тугаганини тушуниши керак», — деди Платинининг адвокати Доминик Неллен.
Прокуратура собиқ футбол амалдорларини фирибгарлик, ҳужжатларни сохталаштириш, маблағларни талон-торож қилиш ва мансаб ваколатларини суиистеъмол қилишда айблаган. Иш 2011 йилда Платинига ФИФА томонидан тўланган 2 миллион швейцар франки (2,26 миллион доллар) миқдоридаги тўловга тааллуқли эди. Бу пул у 1998—2002 йиллар давомида ФИФА учун маслаҳат хизмати кўрсатгани учун берилгани айтилади.
Тергов версиясига кўра, бу тўлов ноқонуний бўлган ва Блаттер ҳамда Платини ФИФАни алдаган. «Улар [Блаттер ва Платини] ФИФА Платинига пул тўлаши керак ёки Платини 2 миллион швейцар франки миқдоридаги ҳақни олиш ҳуқуқига эга деган ёлғон даъволар қилган. Бу алдов айбланувчилар томонидан бир неча бор ёлғон маълумотлар бериш орқали амалга оширилган», — дейилган айблов ҳулосасида.
Бироқ, Блаттернинг таъкидлашича, у ва Платини ўртасида оғзаки келишув бўлган ва бу тўлов 2011 йилгача кечиктирилган, чунки ўша вақтда ФИФАда маблағ етарли эмас эди.
Суд Блаттер ва Платинининг томонини олиб, оғзаки келишув ҳақидаги версияни истисно қилиб бўлмаслигини айтди. Шунингдек, судьялар ушбу тўлов Платини, Франция терма жамоасининг собиқ сардори ва мураббийи сифатида катта тажрибага эга шахс экани билан асосланганини қайд этди.
Мазкур тергов 2015 йилда бошланган ва Блаттер ҳамда Платинининг лавозимларидан четлашишига сабаб бўлган. ФИФАнинг этика қўмитаси уларни саккиз йилга футбол фаолиятидан четлатган, бироқ кейинроқ бу муддат қисқартирилган.
