Ўзбекистон ҳукумати 2030 йилгача иссиқлик ва иссиқ сув таъминотини субсидиялашни босқичма-босқич тўхтатишни режалаштирмоқда. Бу ҳақда 8 июль куни АКТ Агентлигида бўлиб ўтган матбуот анжуманида «Иссиқлик таъминоти» компанияси бошқаруви раиси Илҳом Тўраев маълум қилди.
Унинг сўзларига кўра, ҳозирда Тошкент ва ҳудудларда аҳоли учун иссиқлик ва иссиқ сув учун пасайтирилган тарифлар амал қилмоқда, бозор нархи ва амалдаги нарх ўртасидаги фарқ давлат бюджетидан субсидиялар ҳисобига қопланмоқда.
«Иссиқлик таъминоти соҳасини ривожлантириш учун субсидиялардан воз кечишимиз керак. Аммо буни бирданига амалга ошириш мумкин эмас — бу аҳоли учун оғир юк бўлади. Шу боис, 2030 йилгача субсидиялашни босқичма-босқич тўхтатамиз. Бунинг учун тарифларни йилда 2 марта қайта кўриб чиқиш лозим. Албатта, уларни бир марта ошириш ҳам мумкин, аммо бу субсидиялар улуши туфайли одамларнинг юкини оширади», — деди компания раҳбари.
Тўраевнинг таъкидлашича, иссиқ сув ва иссиқлик таъминоти тарифларининг йилига бир марта оширилиши бюджет ташкилотларига жиддий таъсир кўрсатмайди. «Субсидиялар улуши фуқароларга юк солади. Бунинг олдини олиш учун тарифлар йилига бир ёки икки марта қайта кўриб чиқилади, субсидиялар ҳажми эса аста-секин камайтирилади», — дея қўшимча қилди Илҳом Тўраев.
Унинг қайд этишича, газ ва электр энергиясининг ҳозирги нархлари сақланиб қолган тақдирда, иссиқлик таъминоти тарифларининг ўсиши фақат ишлаб чиқариш харажатларининг ошиши ҳисобига бўлади. Бироқ, энергия ташувчилар нархлари ошган тақдирда, уларнинг нархи ҳам тарифларга киритилади ва бу ўзгаришлар инобатга олиниб қайта кўриб чиқилади.
2024 йил декабрь ойида Бош вазир ўринбосари, Иқтисодиёт ва молия вазири Жамшид Қўчқоров иссиқлик таъминоти билан боғлиқ вазият электр энергияси ва газдан бироз мураккаброқ эканини айтган эди, бунинг сабаби — иссиқликнинг бозор нархи ва амалдаги тарифлар ўртасидаги «катта фарқ». У эскирган ва энергия сарфловчи ускуналар ҳамда ҳисоблагичларнинг йўқлиги билан боғлиқ муаммоларга эътибор қаратди.