2025 йил 1 октябрдан Тошкент шаҳри ва Тошкент вилояти Янгийўл туманида кам таъминланган ва камбағал оилалар учун ижтимоий карта орқали амалга оширилган харидлар учун Қўшилган қиймат солиғини (ҚҚС) қайтаришнинг автоматлаштирилган тизими тест режимида ишга тушди. Бу Вазирлар Маҳкамасининг 2025 йил 29 сентябрдаги қарори билан тасдиқланган вақтинчалик низомда назарда тутилган.
Ҳужжатга кўра, Ягона ижтимоий ҳимоя реестрига ёки Камбағал оилалар реестрига киритилган оилалар ойига 10 баравар базавий ҳисоблаш миқдоридан (4,12 млн сўм) ошмайдиган сумма доирасида ҚҚСнинг бутун миқдорини (12%) қайтариб олишлари мумкин. Битта харид учун қайтариладиган максимал сумма 494,4 минг сўмгача.
ҚҚС қайтариладиган товарлар ва хизматлар рўйхатига қуйидагилар киради: қўй гўшти, парранда гўшти, мол гўшти, тухум, ўсимлик ёғи, ун, шакар, дори воситалари ва тиббий хизматлар.
Қайтариш ишларини молиялаштириш республика бюджетидан Иқтисодиёт ва молия вазирлиги орқали амалга оширилади.
Солиқ қўмитаси тўлов амалга оширилган куни ариза шакллантириб, уни Иқтисодиёт ва молия вазирлигига юборади. Вазирлик маблағларни Ғазначиликка ўтказади, у ердан маблағлар қўмита ҳисобига тушади. Шундан сўнг пул маблағлари ваколатли банкка ўтказилади ва бир иш куни ичида олувчининг ижтимоий картасига келиб тушади.
Қайтариш QR-кодларни сканерламасдан амалга оширилади ва маблағлар тўғридан-тўғри ижтимоий картага тушади. Харид суммасининг 1% ини қайтариш ўрнига, тўланган солиқнинг бутун суммаси қайтарилади.
Солиқ қўмитаси қуйидаги ҳолларда ҚҚС қайтаришдан бош тортишга ҳақли:
- чеклар билан боғлиқ фирибгарлик аломатлари ёки ноқонуний қайтаришга уринишлар аниқланганда;
- сотиб олинган товар қайтариладиган рўйхатда бўлмаса;
- товар миқдори лимитдан ошса;
- чекдаги маълумотлар (штрих-кодлар, идентификация кодлари) хато кўрсатилган ёки аниқланмаса.
Агар харид бўйича ҚҚС аллақачон қайтарилган бўлса, тадбиркорлар чекини ўзгартира олмайдилар, фақат ҚҚС суммаси бюджетга такроран ўтказилган ҳоллар бундан мустасно. Бунинг учун солиқ хизматининг хулосасини олиш керак.
Ижтимоий карталарни бериш 2025 йилнинг январидан Тошкент шаҳри ва Тошкент вилоятининг Янгийўл туманида бошланган. Ягона ижтимоий карта ўндан ортиқ ҳужжатни — туғилганлик ҳақидаги гувоҳнома, ногиронлик маълумотномаси, пенсия гувоҳномаси, талабалик билети, банк картаси ва бошқаларни алмаштиради.
Карта ёрдамида жамоат транспортидан бепул фойдаланиш (бунга ҳақли бўлган аҳоли қатламлари) ва электр энергияси, газ ҳамда ўқиш учун компенсация олиш мумкин. Нафақалар ва ижтимоий ёрдам ҳам ушбу картага тушади.
Картани бериш ижтимоий ҳимояга муҳтож деб тан олинган фуқаролар, ўқувчилар, талабалар, уруш қатнашчилари ва уларга тенглаштирилган шахслар учун мажбурий.
