Ўзбекистон Қурилиш ва уй-жой коммунал хўжалиги вазирлиги ҳамда қурилиш компанияси Golden House «Газета.uz»га «Анҳор Локомотив» ва «Наврўз» боғлари ҳудудида турмуш ва бизнес мажмуалари қурилиши режалаштирилмаётганини тасдиқлади.
Сўнгги кунларда пойтахт аҳолиси ва блогерлар бир неча кун олдин пайдо бўлган кўп қаватли мажмуа лойиҳаси расмларидан ташвишланиб, боғ ҳудудига қурилишга қарши имзо йиғишни бошлади.
Бироқ Қурилиш ва уй-жой коммунал хўжалиги вазирлигида бундай режалар йўқлиги маълум қилинди.
«Ҳозирда „Анҳор“ ва „Наврўз“ боғлари ҳудудида турар-жой бинолари қурилиши бўйича ҳеч қандай лойиҳа ва тасдиқланган ҳужжатлар мавжуд эмас. Бугунги кунда боғлар ўз ҳолича қолмоқда, ҳеч қандай қурилиш режалаштирилмаган», — деди Қурилиш вазирлигининг меъморчилик ва шаҳарсозликни ривожлантириш бошқармаси бошлиғи Азизхон Усмонов.
Боғлар фаолиятини бошқарувчи Anhor Evolution компанияси директори Азиз Шарафутдинов ҳам улар ўз фаолиятини олдинги тартибда давом эттиришини маълум қилди:
«Кўпчилик ижарачилар билан 2025 йил охиригача амалдаги шартномаларимиз бор, баъзилари билан 2026 йилгача. Ҳеч ким ҳеч нарсани бузишни режалаштирмаяпти, боғларнинг иш тартибида ҳеч қандай ўзгариш йўқ. „Анҳор“ савдо марказида реконструкция ишлари олиб борилмоқда, лекин бу бино боғларга тегишли эмас, у хусусий шахсларга қарашли», — деди у.
Фуқаролар Golden House қурилиш компаниясига тегишли деб кўрсатилган лойиҳа тақдимоти ҳақида ҳам ташвиш билдиришган.
Бу борада девелопер ўз сайтида расмий баёнот берди:
«Orient Group Management (Golden House таркибига киради) расман маълум қиладики, Golden House ҳам, Orient гуруҳига кирувчи бошқа биронта ҳам корхона бу лойиҳани амалга оширишни ва ушбу ҳудудда қурилиш ишларини олиб боришни режалаштирмаяпти. Интернетда тарқалаётган расмлар 2024 йилда компанияни тарк этган собиқ ходимнинг ички тақдимотидан олинган», — дейилади хабарда.
Ишчи гуруҳлар компания ва ташқи ҳамкорларга турли лойиҳаларни мунтазам тақдим этади, бироқ уларнинг барчаси ҳам тасдиқланмайди.
Шунингдек, Orient Group Management «Анҳор» боғи ҳудудида жойлашган «Анҳор» савдо марказига бўлган мулк ҳуқуқини бошқа хусусий компанияга ўтказишни режалаштирганини маълум қилди. Фақат шу жойда бошқа компания янги бино қуришни режалаштирмоқда.
Spot нашрининг маълум қилишича, парк ҳудудида жойлашган савдо маркази тўлиқ ёпилган, кўплаб дўконлар фаолиятини тўхтатган. Баъзи ресторанлар ҳам ёпилган, бироқ айрим ошхоналар ҳали ҳам фаолият юритмоқда.
«Анҳор» савдо маркази лойиҳаси The Tower FMG компанияси томонидан ишлаб чиқилган бўлиб, аввал Golden House Property Group (ҳозирда Unique Trade Business) таркибига кирган. Боғ маъмуриятининг маълум қилишича, ҳозирда бу бино The Tower FMG бошқарувида қолмоқда.
Golden House бош директори Владимир Калина бу борада изоҳ бериб, лойиҳанинг компанияга тегишли эканлигига ҳайрон қолганини билдирди:
«Golden House ушбу жой ва айниқса, боғлар ҳудуди бўйича мутлақо ҳеч қандай режаларга эга эмас», — деди у.
Эслатиб ўтамиз, парк ҳудудида қурилиш ҳақидаги дастлабки хабарлар 2025 йил 9−10 февралда ижтимоий тармоқларда тарқалган. 15 февралда эса Telegram-канал «Защитим наш парк Космонавтов» ушбу лойиҳага қарши имзо йиғишни бошлаган.
Жамоатчиликнинг шов-шувли эътирозларидан сўнг, 19 февралда Экологик партия депутати Бош прокуратура, Қурилиш вазирлиги ва Тошкент шаҳар ҳокимиятига расмий сўров юбориб, боғнинг рекреацион зона сифатида сақланиши ва бу ҳудудда турар-жойлар, меҳмонхона ва спорт комплекси қуриш қонунийлиги борасида тушунтириш беришни сўраган.
