CNN ва New York Times нашрларининг хабар беришича, Дональд Трамп маъмурияти Гарвард университети ҳукумат талабларини бажаришдан бош тортганидан сўнг, ушбу таълим муассасасига ажратилган 2,2 миллиард доллардан зиёд грантлар ва 60 миллион долларлик шартномаларни музлатиб қўйди. Гарвард Оқ уйнинг таълим сиёсатига оид кўрсатмаларини рад этган биринчи университет бўлди.
Трамп маъмурияти, жумладан, университетдан қуйидагиларни талаб қилган: турлилик, тенглик ва инклюзивлик (DEI) билан боғлиқ барча дастурларни ёпиш; талабалар ва ўқитувчиларнинг ваколатларини қисқартириш; айрим факультетлар ва дастурларни ташқи аудитдан ўтказиш; қоидаларни бузган хорижий талабалар ҳақида дарҳол федерал ҳокимиятга хабар бериш. Бу шартлар ҳукумат билан “молиявий алоқалар”ни сақлаб қолиш учун бажарилиши лозим эди.
«Президент Трамп олий таълимни яна буюк қилиш устида ишлаяпти — назоратсиз антисемитизмни бартараф этиб, федерал солиқ тўловчиларнинг пуллари Гарвард томонидан хавфли ирқий камситиш ёки ирқий зўравонликни молиялаштиришга йўналтирилишига йўл қўймайди, — деди Оқ уй вакили. — Гарвард ёки VI бўлимни бузмоқчи бўлган исталган муассаса қонун бўйича федерал молиялаштириш ҳуқуқига эга эмас».
Гарвард президенти Алан Гарбернинг таъкидлашича, университет антисемитизмга қарши қатор чора-тадбирларни амалга оширган ва “бундан-да кўпроқ иш қилишни режалаштирмоқда”, аммо федерал ҳукумат ваколатларидан ташқарига чиқадиган талабларни қабул қилмайди.
«Қайси партия ҳокимиятда бўлишидан қатъи назар, ҳеч қайси ҳукумат хусусий университетлар нимани ўқитиш, кимни қабул қилиш ва ишга олиш, қандай илмий соҳаларни ривожлантириш кераклигини белгиламаслиги керак», — дейилади Гарбер баёнотида.
Ўтган ҳафта Гарвард ўқитувчиларидан иборат гуруҳ ҳукуматни судга бериб, шартномалар ва грантларни қайта кўриб чиқиш жараёнини тўхтатишга уринди.
2025 йил январда лавозимга киришганидан бери Трамп мамлакатнинг етакчи университетларини оқ танли талабаларга нисбатан «ирқий камситиш» ва антисемитизмга қарши ҳаракатсизликда айблаб келмоқда.
2025 йил март ойида Трамп маъмурияти 60 та университетни молиялаштиришни қисқартириш билан таҳдид қилиб, улардан ички сиёсатини ўзгартиришни талаб қилган. Шу ойнинг ўзида ҳукумат Колумбия университетининг молиялаштирилишини 400 миллион долларга камайтирган ва натижада университет Оқ уй шартларига рози бўлган.
New York Times манбаларининг таъкидлашича, Трамп маъмурияти атрофдаги бошқа университетларни таҳлика остида қолдириш учун атайлаб Колумбия ва Гарвард каби танилган ўқув юртларини танлаган.
