Фарғона вилоятида яшовчи 31 ёшли эркак бир ёшли фарзандини пичоқлаб ўлдирди. Иш материалларига кўра, 2025 йил 11 сентябрь куни эркак ҳамкасблари билан жанжаллашиб қолган ва ишдан бўшаганини онасига айтган. Бунга жавобан онаси ўғлига бошқа иш топиши ва оиласини боқиши кераклигини айтган.
Уйида эса судланувчи ва унинг турмуш ўртоғи ўртасида маиший мавзуда яна бир низо келиб чиққан. Аёл боласини олиб, ота-онасиникига кетмоқчи бўлган. Эркак ҳиссиётларга берилиб, бола «ҳеч кимга насиб қилмаслигини» айтган. У қизалоқни ошхонага олиб чиқиб, ошхона пичоғи билан унинг қорин соҳасига бир марта зарба берган.
Суд материалларига кўра, қизи бақириб йиғлаганда эркак қўрқиб кетган ва пичоқни қаерга улоқтирганини ҳамда болани унинг қўлидан ким олиб қўйганини эслай олмаслигини тушунтирган. Судланувчининг сўзларига кўра, унинг қизини ўлдириш нияти бўлмаган, воқеа эса «хотини унинг ғурурига тегадиган гаплар айтгани» сабабли содир бўлган.
Қизалоқ зудлик билан шифохонага етказилган. Кўрсатилган тиббий ёрдамга қарамай, гўдак даволаниш муассасасида вафот этган.
Судланувчи айбига қисман иқрор бўлиб, кучли ҳаяжон (аффект) ҳолатида бўлганини даъво қилган, бироқ суд-психиатрия экспертизаси ушбу талқинни тасдиқламади.
Суд жиноятнинг гувоҳлари бўлмагани сабабли — қотиллик содир этилган вақтда судланувчининг хотини ва онаси бошқа хоналарда бўлишгани учун — ишда ўта шафқатсизлик белгиси мавжуд эмас деб топди.
Судланувчига нисбатан Жиноят кодексининг 97-моддаси 2-қисми «в» банди (Айбдорга аён бўлган ожиз аҳволдаги шахсни қасддан ўлдириш) билан 17 йил муддатга озодликдан маҳрум қилиш жазоси тайинланди.
Эркак жазони умумий тартибли колонияда ўтайди.
Зўравонликка қарши Nemolchi.uz лойиҳаси оилавий низо контекстида боланинг ўлдирилиши — уйдаги зўравонликнинг энг юқори кўриниши эканини қайд этди. Фаолларнинг таъкидлашича, «стресс» ёки «ҳақоратларга» таяниш ожиз инсонни қасддан ҳаётдан маҳрум қилишни оқлай олмайди.