Футбол бўйича Ўзбекистон терма жамоаси бош мураббийи Фабио Каннаваро Жаҳон чемпионатидаги иштирок якунланганидан кейин миллий жамоа билан бирга Тошкентга келмайди, деб хабар бермоқда Championat.asia.
Спорт нашрининг маълумотларига кўра, Каннаваро АҚШдан Италияга учиб кетади.
«Биз жамоа билан икки ой давомида бирга бўлдик, ҳозир ҳаммамизга бироз дам олиш керак. Нью-Йоркдан Италияга учиб кетяпман, сизлар билан сентябрь ойида кўришамиз», — деди Фабио Каннаваро.
Италиялик мутахассис қўл остида Ўзбекистон терма жамоаси ўз тарихида илк бор Жаҳон чемпионатида иштирок этди.
Биринчи ўйинда Ўзбекистон Колумбияга 1:3 ҳисобида имкониятни бой берди. Жамоанинг ягона голини Аббосбек Файзуллаев киритди — бу Ўзбекистон терма жамоасининг Жаҳон чемпионатларидаги биринчи голи бўлди.
Иккинчи турда Каннаваро шогирдлари Португалияга 0:5 ҳисобида мағлуб бўлишди. Ушбу учрашувдан сўнг бош мураббий натижа учун жавобгарликни ўз зиммасига олишини маълум қилди, бироқ жамоаси билан фахрланишини таъкидлади.
Гуруҳ босқичининг якуний учрашувида Ўзбекистон терма жамоаси ДР Конгога имкониятни бой бериб (1:3), плей-оффга чиқа олмади ва турнирдаги иштирокини якунлади.
Терма жамоанинг мундиалдаги иштироки якунланиши фонида баъзи блогерлар ва журналистлар жамоа Тошкентга қайтиб келганидан кейин бош мураббий ва миллий терма жамоа вакиллари иштирокида матбуот анжумани ўтказилишини кутишаётган эди.