Тошкентда шаҳар паркинг тизимига эшитиш ва нутқида нуқсони бор фуқароларни расмий равишда ишга жойлаштириш бўйича пилот лойиҳаси бошланди. Ташаббусни 2025 йил май ойидан бошлаб пойтахтда пуллик автотураргоҳларни жорий этаётган Poytaxt Parking компанияси амалга оширмоқда.
Биринчи босқичда илгари расмийлаштирилмаган ҳолда парковкачилар бўлиб ишлаган 4 киши расмий ишга жойлаштирилди. Компания штатига сурдотаржимон қабул қилинган бўлиб, у жамоа ичида ҳар кунлик ўзаро мулоқотни йўлга қўйишга ёрдам беради.
Тошкентдаги норасмий парковщикларнинг аксарияти эшитиш ва нутқида нуқсони бор инсонлар. Расмий мақом йўқлиги сабабли уларнинг фаолияти назорат қилинмасди, бу эса кўпинча тўхташ қоидаларининг бузилишига олиб келарди: автомобиллар икки қаторда, тротуарларда, пиёдалар ўтиш жойлари яқинида ва яшил ҳудудларда тўхтаб қоларди.
Пуллик автотураргоҳлар тизими ишга туширилгандан сўнг норасмий парковкачилар пуллик паркинг жойлари ташкил этилган кўчаларда ўз ишини давом эттирдилар, шу сабабли жойларда баҳсли вазиятлар юзага келди. Компания бу муаммони расмий ишга жойлаштириш ҳал қилади деб ҳисоблади.
«Биз пуллик автотураргоҳ тизими жорий этилган ҳудудларда шаҳар кўчаларида доимий равишда учрашадиганлардан бошладик. Ишга жойлашиш таклифи манзилли қилинди. Агар инсон розилик билдирса, биз унинг номзодини кўриб чиқдик», — деди Poytaxt Parking вакиллари.
Пилот дастурининг барча иштирокчилари уч кунлик ўқув курсидан ўтдилар. У йўл ҳаракати қоидалари асослари, хизмат кўрсатиш стандартлари, илова билан ишлаш ва ностандарт вазиятларда ҳаракат қилишни ўз ичига олди.
«Ўқув курси бизнинг ички жамоамиз томонидан штатдаги сурдотаржимон билан биргаликда ўтказилди. Мулоқот хусусиятларига қарамай, ўқув курси самарали ўтди, бу кўп жиҳатдан ходимларнинг фаол иштироки туфайли бўлди», — дейилади компания хабарида.
Йўналишларда эшитиш ва нутқида нуқсони бор ходимлар ассистент вазифаларини бажарадилар: ҳайдовчиларга қаерга тўхташ мумкинлигини кўрсатадилар, қоидаларга риоя этилишини назорат қиладилар, йўналишни топишга ёрдам берадилар. Ишда имо-ишоралар, пиктограммали карточкалар ва йўриқномали QR-кодлар қўлланилади. Мураккаб вазиятларда йўналиш координатори билан ўзаро ҳамкорлик қиладилар.
Лойиҳа бошида, ташкилотчиларнинг сўзларига кўра, қийинчиликларсиз бўлмади. Баъзи номзодлар расмий ишга жойлашиш имкониятига ишонмадилар, кимдир одатий ва тушунарлироқ бўлган даромад усулини ташлашга тайёр эмас эди. Кўча парковкачиларининг бир қисми норасмий равишда ишлашни давом эттирмоқда, айниқса пуллик ҳудудлар ҳали жорий этилмаган туманларда.
Инклюзив лойиҳа ҳозирча синов режимида амалга оширилмоқда. Унинг келажаги биринчи гуруҳнинг иш натижаларига боғлиқ.
«Биз учун дастурнинг самарадорлигига ишонч ҳосил қилиш муҳим. Босқичма-босқич кенгайтиришни истисно қилмаймиз. Бу жорий интеграция натижаларига боғлиқ. Компаниянинг асосий устувор йўналиши — хизмат сифатини сақлаш ва барча иштирокчилар учун қулай шароитларни таъминлаш», — деди Poytaxt Parking вакиллари.
Компания ижтимоий ҳимояга муҳтож аҳоли қатламлари вакилларини ишга жалб қилиш норасмий бандликни қисқартиришга ёрдам бериши ва шаҳар ҳудудидан тартибли фойдаланишга ҳисса қўшишини таъкидлайди.
