Озарбайжонлик тадбиркор Эмин Агаларов Чарвак соҳилида халқаро даражадаги Sea Breeze Uzbekistan туристик марказини барпо этиш лойиҳасини Ўзбекистон президентига тақдим этди. Лойиҳа доирасида 500−700 гектар майдонда дам олиш масканлари, пляжлар, спорт майдонлари, меҳмонхоналар ва турар жой мажмуалари барпо этилади.
16 декабрь куни Ўзбекистон президенти Шавкат Мирзиёев Тошкент вилояти Бўстонлиқ туманидаги ушбу йирик туристик лойиҳа билан танишди, деб хабар берди давлат раҳбарининг матбуот хизмати.
Эмин Агаларов ва бошқа йирик сармоявий компаниялар Чорвоқ сув омбори соҳилида халқаро даражадаги туристик марказ қуришга тайёр эканлигини маълум қилдилар.
Лойиҳага кўра, марказда дам олиш зоналари, пляжлар, спорт майдонлари, меҳмонхоналар, коттеджлар ва турар жой мажмуалари бўлади. Шунингдек, халқаро брендлар остидаги дўконлар, ресторанлар ва сервис нуқталари очилиши режалаштирилган. Бу ерда фестиваллар, концертлар ва турли маданий тадбирлар ўтказилади.
Ташриф буюрувчилар учун қулайлик яратиш мақсадида икки соҳилни бирлаштирувчи кўприк қуриш режаси ҳам бор. Келажакда марказ йил давомида дам олиш ва яшаш учун мўлжалланган ноёб туристик марказга айланиши кутилмоқда.
Президент лойиҳани қўллаб-қувватлаб, марказни халқаро тажриба асосида босқичма-босқич қуриш муҳимлигини таъкидлади. У бош вазир раҳбарлигида махсус комиссия ташкил этиш ва лойиҳани амалга ошириш учун қонунчилик асосларини ишлаб чиқиш бўйича кўрсатмалар берди. Шунингдек, инфратузилмани ривожлантиришда ёрдам кўрсатишни топширди.
Эмин Агаларов «Ўзбекистон 24» телеканалига берган интервьюсида марказнинг ҳажми 500−700 гектарни ташкил этиши ҳақида айтиб ўтди. Унинг сўзларига кўра, Sea Breeze Uzbekistan лойиҳаси доирасида мактаблар, аквапарк, дам олиш боғлари ҳамда сув спорти ва қишки спорт турлари билан шуғулланиш учун инфратузилма яратилади.
«Давлат раҳбари Озарбайжондаги Sea Breeze лойиҳасининг муваффақиятли фаолияти ҳақида маълумотга эга эканини таъкидлади. Бизда бундай лойиҳаларни амалга ошириш бўйича тажриба мавжуд», — деди Эмин Агаларов.
Sea Breeze — Озарбайжоннинг Баку шаҳрида, Каспий денгизи соҳилида жойлашган премиум даражадаги курорт ва қўлтиқбўйи мажмуаси бўлиб, у 2006 йили Эмин Агаларов томонидан асос солинган. Курорт шаҳар марказидан атиги ярим соатлик масофада жойлашган.
Эмин Агаларов — россиялик тадбиркор Араз Агаларовнинг ўғли ва Озарбайжон президенти Илҳом Алиевнинг собиқ куёви. У 2006 йилнинг 30 апрелида президентнинг катта қизи Лайло Алиевага уйланган ва 2015 йили ажрашган. Шунингдек, у мусиқий фаолияти билан ҳам танилган.
