Ўзбекистон Республикаси Президенти, Қуролли кучлар олий бош қўмондони Шавкат Мирзиёев 2025 йил 21 февраль куни давлатнинг ҳарбий хавфсизлиги ва мудофаа қобилиятини мустаҳкамлаш масалаларига бағишланган йиғилиш ўтказди.
Йиғилишда Хавфсизлик кенгаши аъзолари, Қуролли кучлар таркибидаги вазирлик ва идоралар раҳбарлари, ҳарбий округлар қўмондонлари, шунингдек, видеоконференция шаклида Жўқорғи Кенгес ва Вазирлар Кенгаши раиси, Қорақалпоғистон Республикаси, вилоятлар ва Тошкент шаҳар ҳокимлари ҳамда маҳаллий ҳокимият органларининг масъул ходимлари иштирок этди.
Йиғилиш аввалида давлат раҳбари мамлакат мудофаа қобилиятини мустаҳкамлаш бўйича амалга оширилган чора-тадбирларни, уларнинг натижаларини муҳокама қилди ва бу борада йўл қўйилган айрим камчиликларга эътибор қаратди.
Президентга кўра, миллий армия замонавий қурол-аслаҳа ва техника билан таъминланмоқда, бу эса ҳарбий хизматчиларнинг жангoвар ва маънавий-психологик тайёргарлик даражасини сезиларли равишда оширган.
Жаҳон тажрибаси ва таҳлиллар асосида ички ва ташқи таҳдидларнинг олдини олиш ва бартараф этишга йўналтирилган янги жанговар бўлинмалар ташкил этилди, қўшинларнинг ташкилий тузилмаси такомиллаштирилди.
Шавкат Мирзиёев миллий армияни модернизация қилиш ва замонавийлаштиришнинг янги тизими яратилаётганини таъкидлади. Мудофаа саноати ривожланмоқда, қўшимча корхоналар ташкил этилган. Ўзбекистон Қуролли кучлари 20 дан ортиқ давлат билан икки томонлама ҳарбий ҳамкорлик ўрнатган, 400 дан ортиқ қўшма машғулотларда муваффақиятли иштирок этган.
Бундан ташқари, олий ҳарбий таълим муассасаларининг инфратузилмаси тўлиқ модернизация қилинди, ўқув дастурлари ва методикаси замонавий талабларга мослаштирилди.
Ҳарбий хизматчилар ва уларнинг оила аъзоларининг ижтимоий-ҳуқуқий ҳимояси кучайтирилди. Хусусан, 30 мингга яқин оила уй-жой билан таъминланди, 2000 дан ортиқ ҳарбий хизматчилар фарзандлари олий ўқув юртларига киришда имтиёзлар олди.
2025 йил ва кейинги йиллар учун устувор вазифалар муҳокама қилиниши жараёнида президент замонавий қуролли можаролар, миллий хавфсизликка таҳдид солувчи омиллар ва ҳарбий ҳаракатлар театри хусусиятларини ҳисобга олиш зарурлигини қайд этди.
Унинг таъкидлашича, ҳозирги минтақавий низоларда сунъий интеллект, роботлаштирилган тизимлар, ракеталар, дронлар ва уларга қарши воситалар кенг қўлланилмоқда. Шу боис армия таркибида дронларга қарши кураш, роботлаштирилган техникадан фойдаланиш, ҳаво ҳужумидан мудофаа ҳамда сунъий интеллект технологияларига асосланган киберструктураларни ташкил этиш топширилди.
Давлат раҳбари армиянинг жанговар шайлигини ошириш, ҳарбий тайёргарлик даражасини юксалтириш, сунъий интеллект технологиялари асосида ягона автоматлаштирилган қўмондонлик тизимини жорий этиш, шунингдек, ҳарбий таълим ва кадрлар тайёрлашда дуал таълим тизимини жорий этиш зарурлигини таъкидлади.
Бундан ташқари, армиянинг асосий таянчи бўлган «Асосий сержантлар корпуси» фаолиятини такомиллаштириш, мудофаа саноатини ривожлантириш, ҳарбий хизматчилар ва уларнинг оила аъзоларини ижтимоий қўллаб-қувватлаш, ёшларни ватанпарварлик руҳида тарбиялаш ва уларни ҳарбий спортга жалб этиш бўйича устувор вазифалар белгиланди.
2025 йил 21 февраль куни президент Мудофаа саноати агентлигининг Инновацион технологиялар марказига ташриф буюриб, янги ҳарбий техника намуналари ва мудофаа саноати соҳасидаги лойиҳалар билан танишди. Шунингдек, соҳада хусусий компанияларни шартнома асосида жалб этиш вазифаси топширилди.
