Президент Шавкат Мирзиёев 2025 йил 5 март куни бўлиб ўтган йиғилишда давлат идораларида хорижий хизмат транспорт воситалари ва мебеллардан фойдаланишни кескин қисқартириш ҳамда уларни маҳаллий маҳсулотлар билан алмаштиришни топширди.
Унинг сўзларига кўра, давлат харидлари соҳасида манфаатлар тўқнашуви ва маҳсулотлар ҳамда хизматларнинг оширилган нархларда харид қилиш ҳолатлари кўп учрайди.
Жами 50 дан ортиқ турдаги товар ва хизматларни бевосита харид қилиш мумкин, лекин ҳеч бир раҳбар бу маҳсулотларни тўғридан-тўғри харидлар рўйхатидан чиқариб, танлов асосида сотиб олишни таклиф қилмаган, деди президент.
Иқтисод ва молия вазирлиги ҳамда Ҳисоб палатасига парламентнинг бюджет бўйича масъул қўмиталари билан ҳамкорликда тўғридан-тўғри харидларни икки баробарга қисқартириш вазифаси юклатилди. Шунингдек, йил охиригача давлат харидларида қонунбузарликларни аниқлаш ва олдини олиш учун сунъий интеллект асосида электрон тизим ишга туширилади.
Бундан ташқари, эксперт комиссияси ташкил этилиб, давлат харидлари учун бозордаги ўртача нархларни акс эттирувчи электрон платформа яратилади. Бу маълумотлар мунтазам янгиланиб борилади.
Шу билан бирга, давлат ҳисобидан харид қилинадиган товар ва хизматлар нархи бозор нархидан 20% дан ортиқ бўлмаслиги белгиланади. Бу талабни бузганлар учун жавобгарлик ва жарималар жорий этилади.
Шавкат Мирзиёев давлат бюджетидан ташқари маблағлар ҳисобидан амалга ошириладиган харидларни тартибга солиш вақти келганини таъкидлади. Бюджет ва бюджетдан ташқари маблағлар ҳисобидан харид қилинадиган асосий воситаларга бўлган талаблар кучайтирилади.
