Ўзбекистон Сенати 2026 йил 7 апрель куни бўлиб ўтган мажлисида «Давлат органи ёки унинг мансабдор шахсининг ноқонуний қарори, ҳаракати ёки ҳаракатсизлиги натижасида етказилган зарарни қоплаш тўғрисида»ги қонунни маъқуллади.
Мажлисда сенатор Абдулҳаким Эшмуратов маъруза қилди. Унинг сўзларига кўра, ҳужжат фуқаролар ва юридик шахсларга етказилган зарарни қоплаш тартибини тизимли тартибга солишга қаратилган.
Таъкидланганидек, ҳозирги вақтда тегишли нормалар ўндан ортиқ қонунлар, президент ҳужжатлари ва ҳукумат қарорларида тарқоқ ҳолда мавжуд бўлиб, бюджет ҳисобидан тўловларни амалга оширишнинг ягона механизми мавжуд эмас эди.
Адлия вазири ўринбосари Миржалол Аллақулиевнинг тушунтиришича, гап зарарни ихтиёрий равишда қоплаш институтини жорий этиш ҳақида бормоқда. Унинг сўзларига кўра, ушбу норма томонларга компенсация тартиби бўйича мустақил равишда келишиб олиш ва ортиқча маъмурий тартиб-таомиллардан қочиш имконини беради.
«Бундай келишувни расмийлаштириш тартиби томонларнинг ўзлари томонидан — Фуқаролик кодекси қоидаларига мувофиқ белгиланади», — деди у. Шу билан бирга, вазир ўринбосари келишув мавжудлиги жабрланувчи томонни қонунда белгиланган тартибда мурожаат қилиш ҳуқуқидан маҳрум қилмаслигини таъкидлади.
Унинг қўшимча қилишича, амалдаги қонунчиликда ундирув тўғрисидаги қарорларнинг 15 кун ичида, ҳужжатлар банкларга топширилганда эса дарҳол ижро этилиши аллақачон кўзда тутилган.
«Агар ихтиёрий равишда қоплаш амалга оширилмаса, қонунда белгиланган тартиб-таомиллар қўлланилади ва бу фуқароларнинг ҳуқуқларини ҳеч қандай чекламайди», — деди Миржалол Аллақулиев.
Ўзбекистон депутатлари ушбу қонунни 2025 йилнинг август ойида қабул қилишган эди.