Ўзбекистон президенти Шавкат Мирзиёев 2026 йи 7 апрель куни жисмоний тарбия ва спортни ривожлантириш масалаларига бағишланган видеоселектор йиғилишини ўтказди.
Унда оммавий спортни оммалаштириш, аҳоли саломатлигини яхшилаш ва тайёргарлик тизимини ислоҳ қилиш бўйича чора-тадбирлар тақдим этилди.
Янги ёндашувларга кўра, маҳаллаларда оммавий спорт самарадорлиги нафақат жалб этилган аҳоли сони, балки уларнинг саломатлик кўрсаткичлари билан ҳам баҳоланади. Ҳар бир ҳудуддан биттадан туман танлаб олиниб, у ерда «саломатлик баланси» шакллантирилади.
Шунингдек, фаол аҳоли орасидан соғлом турмуш тарзи волонтёрлари корпусини тузиш режалаштирилган. Улар маҳалла даражасида спорт билан шуғулланиш ва соғлом турмуш тарзи тамойилларини тарғиб қиладилар.
Дастур доирасида ҳар бир туманда 10 та намунали маҳалла бепул спорт формаси ва инвентарлари билан таъминланади. Агар маҳаллада спорт билан қамров ортиб, аҳоли саломатлиги яхшиланса ҳамда юрак-қон томир касалликлари ва диабет даражаси пасайса, йил якуни бўйича волонтёр ва маҳалла раиси 15 млн сўмгача рағбатлантириш олиши мумкин. Оммавий машғулотларга масъул бўлган тренерлар учун иш ҳақига 200 фоизгача устамалар кўзда тутилган.
Бутун дунёда кроссфит каби мураккаб инфратузилма талаб қилмайдиган интенсив машғулотлар оммалашиб бормоқда. Шу муносабат билан 1 майга қадар барча мактаб ва техникумларда тегишли тўгаракларни ташкил этиш топширилди. Келаси йилдан бошлаб кроссфитни «Беш ташаббус» тизимига киритиш режалаштирилмоқда.
Бундан ташқари, давлат хизматчилари ўртасида спортни оммалаштиришнинг янги тартиби жорий этилмоқда. Вазирлар, тармоқ ва банк раҳбарлари, шунингдек, вилоят ҳокимлари шахсий намуна кўрсатган ҳолда ходимларни спортга жалб қилишлари керак бўлади.
Бунинг учун ҳафтанинг бир куни «Спорт куни» деб эълон қилинади. Ушбу кунда вазирлик ва ташкилотларда спорт машғулотлари ўтказилади. Шунингдек, ҳар йили вазирликлар, идоралар, банклар ва ҳокимликлар ўртасида республика мусобақаларини ўтказиш режалаштирилган.
Эслатиб ўтамиз, 2026 йилдан бошлаб Ўзбекистонда давлат хизматчилари ҳар йили тиббий кўрикдан ўтишлари шарт бўлади, давлат органлари ошхоналарида эса ширинликлар, хамирли ва ёғли таомлар сотилиши тақиқланади. 2025 йил август ойидан бошлаб давлат органларида жисмоний тарбия тадбирлари бошланиши лозим.
Президент фармонига кўра, 2021 йилдан бошлаб давлат органлари раҳбарлари ва ходимлари ҳафтада камида бир марта спорт билан шуғулланишлари белгиланган эди. Раҳбарлар шахсий намунада ходимларга антропометрик кўрсаткичларини қандай яхшилаш, семириш даражасини пасайтириш ва саломатликни мустаҳкамлаш зарурлигини кўрсатиб беришлари керак эди.