Дунёдаги энг йирик тез тайёрланадиган таомлар тармоқларидан бири — Burger King яқин ойларда Ўзбекистонда иш бошлайди. Бу ҳақида International Beverages Tashkent компаниясининг таъсисчиси Шуҳрат Эргашев 2025 йил 18 апрель куни президент раислигида ўтказилган йиғилишда маълум қилди.
International Beverages Tashkent — Pepsi, 7UP, Mirinda, Mountain Dew, Adrenaline Rush ва Lipton каби савдо белгилари остида алкоголсиз ичимликлар ишлаб чиқарувчи корхона.
Унинг сўзларига кўра, компания Burger King бренди ресторанларини мамлакатда очиш учун лицензия олган.
«Биз 10 йил олдин улар (Burger King ва McDonald’s) ортидан югуриб, Ўзбекистонга келишларини сўраганмиз. Ҳозирда эса улар билан келишувга эришдик. Ўзбекистон учун лицензия олдик. Икки-уч ой ичида бизда Burger King каби компаниялар очилади. Бу фақат Тошкент билан чекланмайди. Улар бизга Тошкентда марказий офис очиш ва бутун Марказий Осиёга лицензия беришни таклиф қилишди», — деди Шуҳрат Эргашев «Ўзбекистон 24» телеканалига берган интервьюсида.
Шунингдек, у кўплаб хорижий инвесторлар учун Burger King ва McDonald’s каби компанияларнинг бозордаги иштироки инвестиция тўғрисида қарор қабул қилишда муҳим ижобий сигнал эканини таъкидлади.
Президент Шавкат Мирзиёев тадбиркорга ишларида муваффақият тилади.
2025 йил март ойида эса Қозоғистоннинг Holten Group компанияси, International Beverages Tashkent’нинг 0,1% улушига эга бўлган ҳолда, Burger King Kazakhstan франшизасини «Верный Капитал» компаниялар гуруҳидан сотиб олгани маълум қилинган.
