Тошкент шаҳар ҳокимлиги, ижтимоий тармоқларда тарқалган, Корақамиш (2/4-квартал) массивида яшовчи фуқарони итлар тўдаси талагани ҳақидаги маълумотни рад этди.
Расмий маълумотларга кўра, 1966 йилда туғилган фуқаро Л. У. юрак-қон томир етишмовчилиги туфайли вафот этган.
«Тарқатилаётган миш-мишларга қарамай, ҳеч қандай ит ҳужуми содир бўлмаган. Фуқароларни ваҳимага тушмасликка ва фақат расмий манбаларга ишонишга чақириб қоламиз», — дейилади ҳокимлик баёнотида.
Кузатув камераси ёзувларида эркак кишининг кўчадан кетаётганда тўсатдан ерга йиқилгани кўринади. Бироздан кейин у ўтиришга муваффақ бўлган. Ëнидан ўтиб кетаётган ҳайдовчи тўхтаб, эҳтимол, аҳволини сўраган ва йўлида давом этган. Кейинчалик марҳум бошқа жойда топилган.
