Тошкентнинг бош режасини ўзгартириш масаласи Қурилиш ва уй-жой коммунал хўжалиги вазирлигининг кун тартибида йўқ. Бу ҳақда вазир ўринбосари Давронжон Одилов Kun.uz нашрига берган интервьюсида маълум қилди.
«У [бош режага тузатишларни] Қурилиш вазирлиги киритади, демаган. У бош режага ўзгартириш киритиш ҳақида ҳам ҳеч нарса демаган. У «биз бош режага тузатишлар киритишни таклиф қилмоқчимиз» деган. Ҳозирча ундан ҳеч қандай таклиф келиб тушмади. Биз [таклифни] ҳали кўрганимиз йўқ ва кўриб чиқмоқчи ҳам эмасмиз», — дея таъкидлади Одилов.
Унинг сўзларига кўра, пойтахт бош режасини ўзгартириш масаласи вазирлик кун тартибида йўқ: «Қурилиш вазирлигининг кун тартибида [бош режани ўзгартириш] йўқ».
2025 йил 17 июль куни Murad Buildings қурилиш компанияси асосчиси, тадбиркор Мурод Назаров Тошкент бош режасига киритилиши режалаштирилган ўзгаришлар ҳақида хабар берган эди.
«Худо хоҳласа, ҳозир Тошкентнинг бош режасига тузатишлар киритилмоқда, кутяпмиз. Умид қиламизки, тез орада у эълон қилинади. [Бош режага кўра], келажакда қурилиш асосан реновация ва реконструкция ҳудудларида олиб борилади», — деган эди.
2012 йил ёзида Тошкент ва унинг атрофидаги ҳудуднинг 2030 йилгача мўлжалланган бош режасининг техник-иқтисодий асослари муҳокама қилингани ҳақида хабар берилган эди.
2018 йил августдаги президент фармонида пойтахтнинг бош режаси йўқлиги «тартибсиз қурилишга олиб келиши, тадбиркорлик субъектлари фаолиятининг кейинги кенгайишини аниқлашга имкон бермаслиги, шунингдек, шаҳарнинг илдам ижтимоий-иқтисодий ривожланишини чеклаши» айтилган эди. Шаҳар ҳокимига 2018 йил 1 октябрга қадар бош режа концепцияси лойиҳасини ва бош режанинг ўзини ишлаб чиқиш учун халқаро танлов ўтказиш топширилган эди.
Ҳужжатни қабул қилиш бир неча марта қолдирилди. Фақат 2024 йил 24 декабрда Тошкентнинг 2045 йилгача бўлган бош режаси (биринчи босқич — 2030 йилгача) ҳукумат қарори билан тасдиқланди.
2025 йил июнь ойида 3 та компания Тошкентда баланд қаватли турар-жой мажмуалари қуриш ташаббуси билан чиққани маълум бўлди. Лойиҳалардан бири — «Фотон» заводи ўрнида 53 қаватли минора. Бошқа бир турар-жой мажмуаси Давлат геология қўмитасининг собиқ ҳудудида, учинчиси эса Magic City рўпарасида қурилиши мумкин. Барча биноларнинг қаватлиги бош режа параметрларидан ошади.
Қурилиш ва уй-жой коммунал хўжалиги вазирлиги бўлим бошлиғи Азиз Ҳалилов Spot нашрига бош режада биноларнинг рухсат этилган қаватлиги аниқ ҳудуднинг сейсмик чидамлилигини ҳисобга олган ҳолда белгиланишини маълум қилган эди. Лойиҳаларни амалга оширишдан олдин илмий-тадқиқот институтларида мажбурий экспертизадан ўтказилади, қурилиш рухсатномалари эса тасдиқланган бош режага қатъий мувофиқ равишда берилади.
Аниқлик киритилди: Қурилиш ва уй-жой коммунал хўжалиги вазирлиги матбуот хизмати вазир ўринбосарининг интервьюсидан сўнг, етти ой олдин қабул қилинган Тошкентнинг Бош режаси ўзгаришини, лекин бу илмий ёндашувлар ва жамоатчилик фикри асосида бўлишини, алоҳида тадбиркорнинг хоҳишига кўра эмаслигини маълум қилди.