Криптовалюта биржаси Binance Ўзбекистонда маҳаллий ҳамкор орқали фаолият юритишини бошлайди. Бу ҳақида Истиқболли лойиҳалар миллий агентлиги (ИЛМА) матбуот хизмати маълум қилди.
ИЛМА дунёдаги энг йирик криптобиржалардан бири билан Ўзбекистон ҳудудида мижозларга хизмат кўрсатиш бўйича келишувга эришганини маълум қилди. Унинг фаолияти республика қонунчилигига мувофиқ равишда фаолият юритаётган маҳаллий ҳамкор — “Coinpay” МЧЖ орқали амалга оширилади.
Binance Ўзбекистонда қандай ишлайди?
Coinpay криптоактивлар айланмаси соҳасида расмий хизматлар провайдери ҳисобланади ва криптобиржа ҳамда криптодўкон фаолиятини амалга ошириш учун лицензияга эга.
Ўзбекистон фуқаролари Binance платформасига coinpay.uz ресурслари орқали кириш имкониятига эга бўлади. Фойдаланувчилар миллий валютадаги маблағларни банк карталари ва миллий тўлов тизимлари орқали киритиш ва ечиб олиш имконига эга бўладилар.
Тизимнинг ишга туширилиши ҳамкор платформалар модулларининг интеграцияси, жумладан, миллий тўлов тизимларига уланиш ишлари тугалланганидан кейин режалаштирилган. Лойиҳанинг ишга туширилиши ҳақидаги маълумот Coinpay ва Binance расмий ресурсларида эълон қилинади.
Coinpay ўзининг Binance мутахассислари билан биргаликда қонунчиликка қатъий риоя қилган ҳолда интеграция қилиниши керак бўлган қўшма хизматни ишлаб чиқиш жараёнида эканлигини маълум қилди. Кутилмоқдаки, фойдаланувчилар банк карталари ва миллий тўлов тизимлари орқали миллий валютада маблағларни киритиш ва ечиб олиш, шунингдек, Coinpay платформаси (coinpay.uz) орқали криптоактивларга оид хизматлардан фойдаланиш имкониятига эга бўлади.
Coinpay 2023 йил ноябрь ойида криптобиржа ташкил этиш учун лицензия олган, аммо ҳозирча ушбу лойиҳа ишлаб чиқиш жараёнида.
2024 йил январь ойида Агентлик Binance’га криптоактивлар айланмаси соҳасида Ўзбекистон қонунчилигини бузгани учун жарима солган. 26 мартдан 7 июнгача бўлган даврдаги суд жараёнларидан сўнг суд криптобиржани 300 та базавий ҳисоблаш миқдорида жарима тўлашга мажбур қилди. Binance суднинг барча талабларини бажариб, маблағларни давлат бюджетига ўтказди.
Агентлик эслатиб ўтадики, 2023 йил 1 январдан бошлаб Ўзбекистон жисмоний ва юридик шахслари криптоактивлар билан боғлиқ операцияларни (сотиб олиш, сотиш, алмашиш) фақат миллий провайдерлар орқали амалга оширишлари мумкин. Бу президентнинг 2018 йил 3 июлдаги (ПҚ-3832) қарори билан белгиланган.
2022 йил ёзида Binance Ўзбекистон бозорига киришни режалаштирган эди, аммо бу уриниш муваффақиятсиз тугаган. ИМЛАнинг биринчи директор ўринбосари Вячеслав Пак 2023 йил февраль ойида Binance томонидан ишлаш учун қўйилган шартлар ўша вақтда қабул қилиб бўлмайдиган даражада эканлигини айтган эди.
«Улар р2р-операцияларни легаллаштириш талабини қўймоқда. Улар лицензия олган давлатларда серверлар ёки персонални олиб келмаган. Платформада фақат р2р-операциялар амалга оширилади, Binance арбитраждан даромад кўради, пул операциялари эса фуқароларнинг ўзи ўртасида амалга оширилади. Буни ким назорат қилади? Бу қандай пуллар билан ҳисоб-китоб қилинади? Биз бу шартларни қабул қила олмаймиз ва р2р-операцияларни назорат қилиш йўлини тушунмагунимизча, легаллаштирмаймиз», — деган эди регулятор вакили.
2022 йил август ойида Ўзбекистонда 3 та криптобиржа, шу жумладан, энг машҳурлари — Binance, Kraken, FTX ва Huobi Global сайтларига кириш блокланган эди. Криптобиржа, криптодўкон, криптодепозитарий ва майнинг-пул ташкил этиш учун лицензия олган компаниялар рўйхати билан ҳавола орқали танишиш мумкин.
Binance — савдо ҳажми бўйича дунёдаги илк ва энг йирик криптовалюта биржаларидан бири. Платформа 2017 йилда ташкил этилган ва Қайман оролларида рўйхатдан ўтган.
