International Beverages Tashkent компанияси Urban Retail қўшма корхонасининг 100% улушига эгалик қилади. Ўзбекистон Республикаси Монополияга қарши курашиш қўмитаси мазкур битимни маъқуллади.
Қўмита махсус комиссияси томонидан ўтказилган таҳлил натижаларига кўра, мазкур битим корпоратив тузилмавий қайта ташкил этиш (компанияларнинг таъсисчиси битта) ҳисобланиб, рақобат муҳитига бевосита таъсир кўрсатмайди.
International Beverages Tashkent — Pepsi, 7UP, Mirinda, Mountain Dew, Adrenaline Rush ва Lipton савдо белгилари остида алкоголсиз салқин ичимликлар ишлаб чиқарувчи корхона ҳисобланади.
Иккала активнинг таъсисчилари Holten Enterprise Holdings Ltd (99,9%) ва Holten Group Corp (0,1%) ҳисобланади.
Ушбу компаниялар (99% ва 1%) шунингдек, Urban Retailга ҳам эгалик қилади, у эса Baraka Market бренди остидаги супермаркетлар тармоғи орқали алкоголсиз салқин ичимликлар, озиқ-овқат ва ноозиқ-овқат маҳсулотларининг улгуржи савдоси билан шуғулланади.
2019 йилда давлат International Beverages Tashkent даги улушини сотувга қўйган эди. 2022 йилда Монополияга қарши курашиш қўмитаси 99,9% улушни БААнинг Holten Enterprise Holdings компанияси томонидан харид қилинишини маъқуллади. Шу йили компания Urban Retail даги улушни ҳам сотиб олди.
IBT Ўзбекистондаги хусусий компаниялар орасида энг йирик 10 та солиқ тўловчилар қаторига киради. 2024 йилда компания 342,8 миллиард сўм солиқ тўлаб, 9-ўринни эгаллади. Ўтган йилнинг 11 ойи давомидаги айланмаси 3,24 трлн сўмни ташкил қилди. Солиштириш учун: Coca Cola ишлаб чиқарувчиси 634,2 миллиард сўм солиқ тўлаб, ушбу даврдаги айланмаси 6,15 трлн сўмга етган.
