The Times of Israel нашрининг хабар беришича, уч нафар Ўзбекистон фуқароси БААда раввин Цви Коганнинг ўлдирганлиги учун ўлим жазосига ҳукм қилинди. Ўзбекистон Ташқи ишлар вазирлиги бу маълумотни «Газета.uz» нашрига тасдиқлади, аммо ҳозирча батафсил маълумот берилмади.
БАА Ички ишлар вазирлиги айбланувчиларнинг исмларини олдинроқ эълон қилган: Олимбой Тоҳирович (29 ёш), Маҳмуджон Абдураҳим (29 ёш) ва Азизбек Комилович (34 ёш).
БАА давлат ахборот агентлиги (WAM) хабар беришича, БАА Бош прокурори доктор Ҳамад Саийф Ал-Шамси жиноий ишни ўрганиб чиққанидан сўнг, 2025 йил январь ойида уни судга топширишга қарор қилган.
Тергов жараёнида айбланувчилар жабрдийданинг ҳаракатини кузатиб боргани ва уни ўлдиргани аниқланган. Прокуратура судга айбланувчиларнинг қотиллик ва одам ўғирлаш бўйича тан олиш баёнотлари, суд-тиббий экспертиза хулосалари, жарроҳлик экспертизаси натижалари, жиноят қуроллари ҳақидаги маълумотлар ҳамда гувоҳлар кўрсатмаларини тақдим этган.
Ҳукм Абу-Даби Федерал апелляция судининг давлат хавфсизлиги палатасида бўлиб ўтган суд мажлисида эълон қилинди. Жиноят иши бўйича тўртинчи айбланувчи ҳам бор бўлиб, у қотилликда шериклик қилгани учун умрбод қамоқ жазосига ҳукм қилинди.
БАА қонунчилигига кўра, ўлим жазоси ҳақидаги ҳукм олий федерал судга шикоят қилиниши мумкин.
Бош прокурор берилган ҳукм БААнинг терроризмга қарши қатъий курашиш ва адолат ҳамда қонун устуворлигини таъминлаш бўйича позициясини акс эттиришини таъкидлади. Шунингдек, у суд тизими миллий хавфсизлик ва барқарорликни заифлаштиришга уринишларга қатъий қарши туришини билдирди.
Бундан ташқари, бош прокурор БАА «барча турли миллат ва эътиқод вакиллари тинч-тотув яшайдиган, қонунлар эса уларнинг хавфсизлиги ва ҳуқуқларини ҳимоя қилувчи глобал ҳамжиҳатлик ва бағрикенглик модели» бўлиб қолишини қўшимча қилди.
28 ёшли раввин Цви Коган Исроил ва Молдова фуқаролигини олган бўлиб, Абу-Дабида «Хабад» яҳудий диний ҳаракатини вакили бўлган ва бир неча йилдан бери БААда яшаб келган. 2024 йил ноябрь ойида у Дубайда бедарак йўқолган, бир неча кундан сўнг унинг жасади Уммон чегараси яқинидаги Ал-Айн шаҳрида топилган.
2024 йил декабрда The Wall Street Journal нашри хабар беришича, қотиллар Коганни ўғирлаб, уни қўшни Уммонга олиб ўтишни режалаштирган. Шунингдек, айрим гумондорлар жиноятдан кейин Туркияга қочиб кетгани таъкидланган. Исроил ҳукумати буни «антисемитик террорчилик ҳужуми» деб баҳолаган.
2024 йил ноябрь ойида Ўзбекистон ташқи ишлар вазири Бахтиёр Саидов Исроил элчиси Гидеон Лустигга раввин Цви Коганнинг вафоти муносабати билан ҳамдардлик билдирган. Шунингдек, Саидов Ўзбекистоннинг БАА ва Исроил ҳокимиятлари билан тергов бўйича ҳамкорлик қилаётганини маълум қилган.
2024 йил декабрь ойида бу ҳодисадан сўнг, Абу-Даби ҳокимияти сабабини тушунтирмасдан кўплаб Ўзбекистон фуқароси бўлган эркакларнинг мамлакатга киришини тақиқлаб, уларни ортга қайтарган.
