Ўзбекистоннинг Қатардаги элчиси Ашраф Ходжаев бир вақтнинг ўзида Жанубий Африка Республикасидаги (ЖАР) элчи этиб тайинланди.
2025 йил 2 октябрь куни у ЖАР Президенти Сирил Рамафосага ишонч ёрлиқларини топширди. Маросим Преториядаги Сефако Макгато қароргоҳида бўлиб ўтди, дея хабар берди ЖАР Президенти матбуот хизмати.
«Элчи Ходжаев Президент Шавкат Мирзиёевнинг энг яхши тилакларини етказди ва Ўзбекистоннинг ўзаро манфаатли иқтисодий ҳамкорликни кенгайтиришга тайёрлигини таъкидлади», — дейилади Ўзбекистоннинг Қатардаги элчихонасининг Instagramдаги хабарида.
Дипломат Ўзбекистондаги биринчи GTL заводи — Марказий Осиёдаги йирик лойиҳа — Жанубий Африканинг Sasol компанияси технологияларидан фойдаланилган ҳолда қурилганини эслатиб ўтди, бу эса инновацион ҳамкорлик салоҳиятини таъкидлайди, дейилади хабарда.
Ашраф Ходжаев 2024 йил февраль ойида Қатардаги элчи этиб тайинланган ва Доҳадаги элчихона 2023 йил декабрда очилганидан сўнг унинг биринчи раҳбари бўлган эди.
Ўзбекистоннинг 1999 йилдан 2002 йилгача ЖАРдаги биринчи элчиси Анқарадаги (Туркия) элчи Абдулаҳат Жалилов бўлган. У ўша пайтдаги ЖАР Президенти Табо Мбекига ишонч ёрлиқларини топширган.
