2026 йилда Жиззах вилоятига инфратузилма ва тадбиркорликни ривожлантириш учун қарийб 10 трлн сўм ажратилади. Бу ҳақда Шавкат Мирзиёев 2025 йил 2 декабрь куни Жиззах вилояти Халқ депутатлари Кенгашининг навбатдан ташқари сессиясида маълум қилди.
Президент Бахмал ва Зомин тоғ ҳудудларини ягона туристик ҳалқага бирлаштириш «юзлаб сервис объектларини ишга тушириш, минглаб одамларни иш ўринлари билан таъминлаш ва туристик хизматлар экспортини бир неча баравар ошириш имконини беради» деб таъкидлади.
Давлат раҳбари келгуси йилда Зомин-Бахмал-Ғаллаорол йўлининг 158 километрлик қисмини таъмирлашни бошлаш бўйича топшириқ берди.
Шунингдек, Бахмалда 40 млн доллар қийматидаги 39 гектар майдонда туристик кластер ташкил этиш ташаббуси қўллаб-қувватланди. Туманга туристик мақом берилади.
Шавкат Мирзиёев йирик ҳаво кемаларини қабул қилиш учун Арнасой аэропортини модернизация қилиш ва Айдар-Арнасой кўлигача темир йўл қуриш зарурлигини таъкидлади.
Эслатиб ўтамиз, Арнасой туманидаги янги аэропорт 2025 йил сентябрь ойида L-410 самолётида биринчи синов рейсини қабул қилган эди. Учиш-қўниш йўлаги узунлиги 1700 м бўлган аэропорт Айдаркўлда яратилаётган туристик кластернинг таянч объектига айланиши керак — у меҳмонхоналар, дам олиш масканлари ва сув спорти турлари учун инфратузилмани ўз ичига олади.
Президент, шунингдек, Урбанизация бўйича Миллий қўмита ва вилоят ҳокимлигига Европа экспертларини жалб қилган ҳолда Жиззах ва Шароф Рашидов туманини ягона агломерация сифатида ривожлантириш бўйича бош режа ишлаб чиқишни топширди.
Президент аҳоли талабларини ҳисобга олган ҳолда Жиззахдаги транспорт оқимини енгиллатиш учун 10 километрлик айланма йўл қурилишини қўшимча қилди. У Даштабод посёлкаси ва Ҳаваст тумани ўртасидаги темир йўл устидан янги кўприк қурилиши ишлари бошланганини маълум қилди.