АҚШ Ички хавфсизлик вазирлиги (DHS) ихтиёрий депортация дастурини ишга туширганини эълон қилди, унга кўра ноқонуний муҳожирлар мамлакатдан кетишда ёрдам ва 1000 доллар миқдорида пул маблағлари олишлари мумкин.
“CBP Home App (муҳожирлар учун DHSнинг расмий иловаси – таҳр.) орқали ўз ихтиёри билан депортация қилинадиган ҳар қандай ноқонуний хорижлик ҳам 1000 доллар миқдорида стипендия олади”, — дейилади вазирлик хабарида. Сумма муҳожир илова орқали ўз ватанига қайтишини тасдиқлаганидан сўнг тўланади.
Вазирликнинг таъкидлашича, бу АҚШни тарк этишнинг “муносиб усули” бўлиб, ноқонуний муҳожирларга Иммиграция ва божхона хизмати (ICE) билан учрашишдан қочиш имконини беради.
DHSнинг аниқлик киритишича, CBP Home Appга ариза берган ноқонуний муҳожирлар, агар улар уйга қайтиш учун “жиддий саъй-ҳаракатлар” қилаётганликларини кўрсатсалар, кетишларига қадар қўлга олинмайди ва депортация қилинмайди. Дастурда иштирок этиш уларга келажакда АҚШга қонуний асосларда қайтиш имкониятини ҳам сақлаб қолади.
DHS ҳисоб-китобларига кўра, дастур, ҳатто стипендиялар тўловини ҳисобга олганда ҳам, ноқонуний муҳожирларни депортация қилиш харажатларини тахминан 70% га қисқартиради. Ҳозирда бир нафар ноқонуний муҳожирни ҳибсга олиш, ушлаб туриш, қамоқда сақлаш ва чиқариб юбориш АҚШ ҳукуматига ўртача 17 121 долларга тушади.
2025 йил апрель ойида Washington Post газетаси АҚШ президенти Дональд Трамп маъмурияти унинг ҳокимиятдаги биринчи йилида 1 миллионгача муҳожирни депортация қилиш ниятида эканлигини ёзган эди.
