Халқаро қиличбозлик федерацияси (FIE) президенти этиб сайланган Алишер Усмонов ўз ваколатларини вақтинча тўхтатишга қарор қилди. Тадбиркор вакилининг маълум қилишича, бундай қарор федерация манфаатларини ҳимоя қилиш мақсадида қабул қилинган.
“Сайловда тўлиқ ғалаба қозонганидан сўнг, Алишер Усмонов FIE манфаатларини кўзлаб, унга қарши жорий этилган ҳуқуқий асосларга эга бўлмаган санкцияларнинг FIE фаолиятига таъсир қилишининг олдини олиш учун зарур чораларни кўришга тайёр эканлигини маълум қилди. Шу муносабат билан у FIE Ижроия қўмитасига ўз ваколатларини ихтиёрий равишда вақтинча тўхтатгани ҳақида хабар берди. Ҳар қандай масала қонун ва адолат доирасида ҳал қилиниши керак”, — дея таъкидлади тадбиркорнинг вакили.
Эслатиб ўтамиз, 30 ноябрь куни Тошкент шаҳрида ўтказилган федерация конгрессида Алишер Усмонов яна бир бор FIE президенти этиб сайланган эди. У 120 овоз олган бўлса, рақиби — Швеция қиличбозлик федерацияси президенти Отто Дракенберг — 26 овоз билан чекланган.
Алишер Усмонов 2008 йилдан буён FIE президенти лавозимини эгаллаб келаётган эди. 2021 йил ноябрь ойида эса ягона номзод сифатида янги муддатга қайта сайланган. Бироқ, 2022 йил март ойида Европа Иттифоқи томонидан унга нисбатан жорий этилган санкциялар туфайли ўз ваколатларини “адолат тиклангунига қадар” вақтинча тўхтатган эди. Шу вақтдан бери FIE президенти вазифасини грек вакили Эммануэль Катсиадакис бажариб келаётган эди.
