2026 йил январь-март ойларида Ўзбекистонда 1102 та йўл-транспорт ҳодисаси содир бўлди, ҳолатларнинг деярли учдан бир қисмида (31,4%) ўлим ҳолати қайд этилган: 346 киши ҳалок бўлган. Бу ҳақда 11 апрель куни бўлиб ўтган матбуот анжуманида ички ишлар вазири ўринбосари — Тергов департаменти бошлиғи Рамазон Ашрапов маълум қилди. У жароҳат олганлар сонига аниқлик киритмади.
Таққослаш учун — 2025 йилнинг биринчи чорагида расман 1293 та ЙТҲ қайд этилган эди. Камайиш 191 та аварияни ёки тахминан 15 фоизни ташкил этди.
Вазир ўринбосари йўл ҳаракати хавфсизлиги билан боғлиқ муаммолар «энг оғриқли масалалардан бири» эканлигини тан олди.
Барча ЙТҲларнинг учдан бир қисми — 32,9 фоизи белгиланган тезликка риоя қилмаслик оқибатида содир бўлган. Светофор ишораларига амал қилмаслик аварияларнинг 22,4 фоизига сабаб бўлган. 13,6 фоиз ҳолатда ҳайдовчилар пиёдаларнинг устуворлик принципини бузишган. 4,2 фоиз ҳолатда авариялар ҳайдовчиларнинг руль бошқарувида ухлаб қолиши туфайли келиб чиққан.
2025 йил давомида Ўзбекистонда 9226 та ЙТҲ қайд этилган бўлиб, уларда 2188 киши ҳалок бўлган, яна 8901 киши жароҳатланган (йиллик камайиш — 1 фоиздан кам).