2025 йилнинг 1 январи ҳолатига кўра, Ўзбекистоннинг расмий резерв активлари 41.18 млрд АҚШ долларини ташкил этди. Бироқ, декабрь ойида улар 290.2 млн долларга камайди. Бу ҳақида Марказий банк маълумотларида келтирилган.
Олтин ва валюта захираларининг динамикаси
Ўтган ойда хорижий валюта захиралари 414 млн АҚШ долларига кўпайди. Шу билан бирга, олтиннинг жисмоний ҳажми 11.6 млн трой унциядан 11.9 млн трой унциягача (9.3 тонна) ўсди, унинг умумий қиймати эса 906.3 млн АҚШ долларга ошди.
2024 йил якунига кўра, мамлакатнинг умумий олтин-валюта захиралари 6.62 млрд АҚШ долларига ортди. Бу кўрсаткич 34.56 млрд АҚШ долларидан 41.18 млрд АҚШ долларигача ўсган. Шу билан бирга, хорижий валюта захиралари 771.8 млн долларга камайиб, 8.6 млрд АҚШ долларини ташкил этди.
Олтин захираларининг қиймати эса 7.4 млрд АҚШ долларга ёки 30% га ўсди. Ушбу кўрсаткич 24.6 млрд доллардан 32.04 млрд АШҚ долларига етган. Олтиннинг жисмоний ҳажми эса 0.4 млн трой унцияга (12.4 тонна) ошган ва умумий ҳажм 12.3 млн трой унцияга (382.5 тонна) етган.
Бу ўзгаришлар унция олтиннинг нархи 2024 йил давомида 2063 АҚШ долларидан 2624 долларга (+27%) ўсгани билан боғлиқ.
Активларни диверсификация қилиш
Марказий банк ўтган йилда активларни диверсификация қилиш доирасида хорижий қимматли қоғозларни харид қилишни бошлади. Йил охирига келиб, уларнинг умумий ҳажми 101.7 млн АҚШ долларига етди.
Ўтган йиллардаги резерв ўзгаришлари
Сўнгги йилларда Ўзбекистоннинг олтин-валюта захиралари динамикаси:
- 2019 йил: +2.7 млрд АҚШ доллари;
- 2020 йил: +4.38 млрд АҚШ доллари;
- 2021 йил: +105.5 млн АҚШ доллари;
- 2022 йил: +1.5 млрд АҚШ доллари;
- 2023 йил: –1.2 млрд АҚШ доллари.
Рекорд экспорт кўрсаткичлари
Ўзбекистон 2024 йилнинг январь-ноябрь ойлари давомида рекорд даражада — 8.15 млрд АҚШ долларлик олтин экспорт қилди. Бу ўтган йилнинг шу даврига нисбатан 2.3 баробар кўпдир. Ушбу сумманинг 1.28 миллиард доллари фақат ноябрь ойига тўғри келади.
