Шу ҳафтада Нью-Йоркдан Тошкентга яна 10 нафар Ўзбекистон фуқаросининг депортация қилиниши кутилмоқда, деб хабар берди мамлакат Ташқи ишлар вазирлиги матбуот котиби Ахрор Бурхонов.
АҚШ бу фуқароларни аввал Коста-Рикага юборишни режалаштирган эди, бироқ Ўзбекистон ва АҚШ томонлари ўртасидаги музокаралар натижасида уларни Ватанга қайтариш бўйича келишувга эришилди.
2025 йил 24 февраль куни АҚШ Коста-Рикага депортация қилишни режалаштирган яна етти нафар ўзбекистонлик юртга қайтган эди.
Сўнгги ҳафталарда АҚШ Осиё давлатларидан, жумладан, Ўзбекистондан бўлган юзлаб муҳожирларни Панама ва Коста-Рикага юборган бир нечта депортация парвозларини амалга оширди.
Ўзбекистон Ташқи ишлар вазирлиги юртдошларнинг депортация қилиниши ҳақидаги хабарларга изоҳ бериб, фуқароларнинг АҚШдан хавфсиз қайтишини таъминлаш бўйича Америка ва Лотин Америкаси давлатлари ҳукумати билан мулоқот олиб борилаётганини маълум қилди. Шунингдек, вазирлик АҚШдаги Ўзбекистон дипломатик ваколатхоналари фуқаролардан мурожаат келиб тушган тақдирда, уларга тўлиқ ёрдам кўрсатишини таъкидлади.
