АҚШ президенти Дональд Трамп маъмурияти бутун дунё бўйлаб АҚШнинг хорижий ваколатхоналарида фаолият юритаётган 30 га яқин касбий дипломатларни — элчилар ва бошқа юқори лавозимли ходимларни чақиртириб олишга қарор қилди, деб хабар беради Associated Press.
АҚШ Давлат департаментидаги AP манбаларининг сўзларига кўра, ўтган ҳафтада камида 29 та давлатдаги дипломатик миссия раҳбарлари ваколат муддати 2026 йил январь ойида тугаши ҳақида хабардор қилинган.
Чақиртириб олинаётган барча дипломатлар президент Джо Байден даврида лавозимга тайинланган. Уларнинг ўрнини Трампнинг «Аввало Америка» сиёсатини тўлиқ қўллаб-қувватлайдиган ходимлар эгаллайди, деб қайд этади агентлик.
Энг кўп дипломатлар Африкадан чақиртириб олинмоқда, у ерда 13 та давлат: Бурунди, Камерун, Кабо-Верде, Габон, Кот-д’Ивуар, Мадагаскар, Маврикий, Нигер, Нигерия, Руанда, Сенегал, Сомали ва Угандадаги элчиларнинг ваколатлари тугатилмоқда.
Шунингдек, Осиё-Тинч океани минтақасидаги олтита давлат: Фижи, Лаос, Маршалл ороллари, Папуа — Янги Гвинея, Филиппин ва Вьетнамдаги элчилар алмашади.
Европада тўртта давлат — Арманистон, Македония, Черногория ва Словакия, Яқин Шарқда — Жазоир ва Миср, Жанубий Осиёда — Непал ва Шри-Ланка, Ғарбий ярим шарда — Гватемала ва Суринамдаги дипломатлар чақиртириб олинмоқда.
Давлат департаменти чақиртириб олинаётган элчиларнинг аниқ сони ва исм-шарифларига изоҳ беришдан бош тортиб, бу ўзгаришларни «ҳар қандай маъмуриятдаги стандарт жараён» деб атади. Идора элчи президентнинг «шахсий вакили» эканини ва президент ушбу мамлакатларга «Аввало Америка» кун тартибини илгари сурадиган одамларни тайинлаш ҳуқуқига эга эканини таъкидлади.
AP манбаларининг таъкидлашича, кадрлар алмашинувига дуч келган шахслар дипломатик хизматдаги ишини йўқотмайди, балки хоҳишларига кўра бошқа вазифаларни бажариш учун Вашингтонга қайтадилар.