Ўзбекистон Соғлиқни сақлаш вазирлиги иккита ҳудудда катталар учун хоспислар қуриш учун молиявий маблағ олади. Бу парламент палаталари томонидан маъқулланган 2026 йил учун Давлат бюджети тўғрисидаги қонунда кўзда тутилган. Қонунчилик палатаси ва Сенат томонидан тасдиқланган ҳужжатлар жамоатчилик учун ҳали эълон қилинмаган. Қонун президент томонидан имзоланганидан кейингина эълон қилинади.
ЎзЛиДеП партиясидан сайланган депутат Мавлуда Иброҳимова 2025 йил 3 декабрь куни қонун лойиҳасининг биринчи ўқишдаги муҳокамаси чоғида соғлиқни сақлаш соҳасида кўрилаётган чора-тадбирларга қарамай, оғир беморларга ёрдам кўрсатиш билан боғлиқ ҳал этилмаган масалалар қолаётганини таъкидлади.
«Алоҳида эътибор ва ихтисослаштирилган инфратузилмани талаб қиладиган беморлар тоифалари бор, бироқ бу масалалар ҳанузгача ўз ечимини топгани йўқ. Бугунги кунда республикамизда 100 мингдан ортиқ онкологик касалликка чалинган бемор диспансер назоратида туради», — деди.
Президент қарорлари билан Хоразм, Самарқанд, Фарғона ва Тошкент вилоятларида минтақалараро хоспислар ташкил этиш кўзда тутилган эди. Ҳозирги вақтда Фарғона ва Тошкент вилоятларидаги хоспислар бўйича ишлар тўхтаб қолган, деб хабар берди парламент аъзоси.
Шу муносабат билан у иккита ҳудудда — Фарғона ва Тошкент вилоятларида хосписларни ишга тушириш учун қўшимча маблағ ажратиш имкониятини кўриб чиқишни таклиф қилди.
Бош вазир ўринбосари — иқтисодиёт ва молия вазири Жамшид Қўчқоров тақдим этилган бюджет лойиҳасида хоспислар қурилиши учун харажатлар кўзда тутилмаганини тасдиқлади. Унинг сўзларига кўра, масала қўшимча равишда ишлаб чиқилади.
«Шу муносабат билан қуйидагини таклиф қилмоқчиман: иқтисодиёт ва молия вазири ўринбосари Отабек Фозилкаримов ва соғлиқни сақлаш вазири ўринбосари Элмира Боситхоновага кейинги ўқишгача ушбу масалани биргаликда кўриб чиқиш ҳамда молиялаштиришнинг эҳтимолий манбалари бўйича таклифлар киритиш топширилсин», — деди Қўчқоров.
Кейинчалик, 2025 йил 5 декабрь куни бюджет тўғрисидаги қонун лойиҳасининг иккинчи ўқишдаги муҳокамаси чоғида Қонунчилик палатасининг Бюджет ва иқтисодий масалалар қўмитаси раиси Шарофиддин Назаров депутатнинг таклифлари инобатга олинганини маълум қилди.
Хусусан, Соғлиқни сақлаш вазирлигига Тошкент ва Фарғона вилоятларида минтақалараро хоспислар ташкил этиш учун қўшимча 50 млрд сўм ажратилмоқда.
Тошкентда давосиз беморлар учун хосписни бир неча йилдан бери оча олишмаяпти.
Хоспис ва паллиатив ёрдамни ташкил этиш президентнинг 2017 йилда қабул қилинган Ўзбекистонда онкология хизматини ривожлантириш тўғрисидаги қарорида кўзда тутилган эди. Дастлаб Тошкентда катталар учун хоспис очилиши 2019 йилга мўлжалланган эди. Ҳозирги вақтда хоспислар фақат Самарқанд ва Хоразм вилоятларида мавжуд. Фарғона вилоятидаги хоспис ҳали ўз фаолиятини бошламаган.
Президентнинг 21 февралдаги «Ўзбекистон-2030» давлат дастурини амалга ошириш тўғрисидаги фармони билан 2024 йил якунигача эҳтиёждан келиб чиқиб, вилоят марказларида, шунингдек, Тошкент ва Нукус шаҳарларида оғир гематологик, онкологик ва клиник-иммунологик касалликларга чалинган беморларга паллиатив ёрдам кўрсатувчи камида биттадан хоспис ташкил этиш топширилган эди.
2023 йил ноябрь ойида Олий Мажлис депутатлари пойтахтда хоспис қурилишини назоратга олган эди, бироқ унинг қурилиши кечиктирилди.
2023 йилда пойтахт хоспис қурилиши учун атиги 3 млрд сўм ажрата олди. Пудратчи пул йўқлиги сабабли иш тўхтаб қолганини маълум қилган эди. Ўша йили Тошкент шаҳар ҳокимлиги «Бувижонлар мактаби», «Оталар чойхонаси» каби ҳар ойлик учрашувларни ўтказиш учун қарийб 12 млрд сўм ажратган. Гул кўчатларини сотиб олиш ва бошқа мақсадлар учун ҳам миллиардлаб маблағлар сарфланган.
Пойтахтда хоспис ташкил этиш хоспис ёрдамини кўрсатиш бўйича тажрибани мамлакат миқёсида ёйиш учун зарур. Соғлиқни сақлаш вазирлигининг янгиланган протоколларига қарамай, амалдаги тиббиёт муассасаларида, шунингдек, вилоят ва туман онкология марказларида оғриқни қолдиришнинг инсоний усуллари қўлланилмайди.
2024 йил ноябрь ойида иқтисодиёт ва молия вазири ўринбосари Отабек Фозилкаримов Тошкентда хоспис қурилишини молиялаштиришнинг асосий манбаи шаҳар бюджети эканлигини маълум қилди. Ўшанда у давосиз беморларга инсоний ғамхўрлик қилиш стандартларини жорий этиш бўйича миллий марказга айланиши керак бўлган пойтахтдаги катталар хосписининг очилиши 2025 йил февраль ойига қолдирилганини айтган эди. Унинг сўзларига кўра, объектни молиялаштириш 90 фоиздан ортиқроққа якунланган, бироқ объект ҳалигача фойдаланишга топширилмаган.
