Буюк Британия 2025 йил 18 декабрь куни Россияга қарши санкциялар рўйхатини кенгайтирди ва унга 24 нафар жисмоний ва юридик шахсни, жумладан, Ўзбекистондан бир нафар тадбиркор ва 4 та компанияни киритди.
Рўйхатга, хусусан, Рустам Раҳимжонович Мўминов тушди. Ҳужжатда қайд этилишича, у 1953 йилда Тошкентда туғилган ҳамда бир вақтнинг ўзида Ўзбекистон, Исроил ва Россия фуқаролигига эга. Британия ҳукуматининг таъкидлашича, у Украинадаги вазиятни беқарорлаштиришга, унинг ҳудудий яхлитлиги, суверенитети ёки мустақиллигига путур етказишга ёки таҳдид солишга ёрдам бериши мумкин бўлган молиявий хизматлар, маблағлар, иқтисодий ресурслар, товарлар ва технологияларни тақдим этиб келмоқда. Аввалроқ Мўминовга нисбатан Европа Иттифоқи ва Украина санкциялар жорий қилган эди.
Ўзбекистонда рўйхатдан ўтган компаниялардан қуйидагилар санкциялар рўйхатига қўшилди:
- Фарғона кимё заводи;
- Gelion Business Trade МЧЖ (Тошкент);
- Chemistry International МЧЖ ҚК (Навоий);
- Raw Materials Cellulose МЧЖ (Жиззах).
Британия расмийларига кўра, ушбу корхоналарнинг барчаси Россияга Россия армияси Украинага қарши урушда фойдаланаётган товарлар ёки технологияларни етказиб бермоқда.
Фарғона кимё заводи ва Raw Materials Cellulose, шунингдек, Украина санкциялари остида ҳам бор.
Фарғона кимё заводи ва Raw Materials Cellulose «Важные истории», Vlast.kz нашрлари ва OCCRP консернининг қўшма суриштирувида, шунингдек, Би-би-си Рус хизматининг суриштирувида тилга олинган эди. Материалларда таъкидланишича, ушбу икки корхона Россия порох заводларига пахта целлюлозасини ҳам бевосита, ҳам хусусий воситачилар орқали етказиб бермоқда. Журналистларнинг ҳисоб-китобларига кўра, Россиянинг 2022 йилда Украинага кенг кўламли бостириб кириши бошланганидан бери ушбу етказиб бериш ҳажми бир неча баравар ошган.
Chemistry International ҚК 2021 йил 27 октябрда рўйхатдан ўтган. У пахтадан целлюлоза ва гидроксипропилметилцеллюлоза ишлаб чиқариш билан шуғулланади. Унинг таъсисчилари Alliance Capital (74,20%) ва «Навоийазот» АЖ (25,80%) ҳисобланади. Компаниянинг устав капитали 46,2 млрд сўмни ташкил этади.
Orginfo.uz маълумотларига кўра, Gelion Business Trade МЧЖ 2024 йил 5 февралда рўйхатдан ўтган. У ихтисослашмаган улгуржи савдо билан шуғулланади, унинг таъсисчиси сифатида Раҳматжон Райимжонович Шодиев (100%) кўрсатилган. Устав капитали 5 миллион сўмни ташкил этади.
Санкциялар рўйхатига, шунингдек, Қирғизистонда рўйхатдан ўтган Kifiko компанияси ҳам киритилган. Британия ташкилотни Россияга молиявий хизматлар кўрсатишда айбламоқда.
