АҚШ Браун университетида юз берган отишмадан сўнг Diversity Visa (DV1) иммиграция дастури, яъни грин-карта лотереяси фаолиятини тўхтатмоқда. Бу ҳақда АҚШ ички хавфсизлик вазири Кристи Ноэм маълум қилди.
Ноэмнинг айтишича, отишмани содир этган Клаудио Мануэл Невеш Валенте АҚШга 2017 йилда DV1 дастури орқали кириб келган ва грин-карта олган.
«Президент Дональд Трампнинг кўрсатмасига биноан, бошқа бирор америкалик ушбу ҳалокатли дастурдан жабр кўрмаслигини таъминлаш мақсадида USCIS (АҚШ Фуқаролик ва иммиграция хизматлари)га DV1 дастурини зудлик билан тўхтатишни топширдим», — деб ёзди Ноэм Х ижтимоий тармоғида.
Род-Айленд штатининг Провиденс шаҳридаги Браун университетида отишма 2025 йил 13 декабрь куни юз берган эди. Бунинг оқибатида икки нафар талаба ҳалок бўлди, улардан бири асли ўзбекистонлик бўлган 18 ёшли Муҳаммад Азиз Умрзоқов. У нейрохирург бўлишни орзу қиларди.
Ўқ узган шахс Португалия фуқароси, 48 ёшли Клаудио Мануэл Невеш Валенте бўлиб чиқди. У 2000 йилда Браун университетида таҳсил олган. Эркак, шунингдек, отишмадан икки кун ўтиб Массачусетс технология институти профессорини ўлдирганликда ҳам гумон қилинмоқда. 18 декабрь куни Невеш Валенте Нью-Гэмпширдаги омборхонадан ўлик ҳолда топилди. Ҳуқуқ-тартибот идоралари маълумотларига кўра, ўлимга ўз жонига қасд қилиш сабаб бўлган. Унинг мотивлари номаълумлигича қолмоқда.
2017 йилда, ўзининг биринчи президентлик муддати даврида Дональд Трамп Нью-Йоркда асли ўзбекистонлик иммигрант томонидан содир этилган терактдан сўнг ҳам DV1 дастурини бекор қилишга уринган эди.
Манхэттенда саккиз кишининг ўлимига сабаб бўлган теракт 31 октябрь куни юз берганди. Ҳужумчи 29 ёшли асли ўзбекистонлик Сайфулло Соипов бўлиб, у АҚШга 2010 йилда грин-карта ютиб олиб келган эди.
Теракт куни Соипов пикап машинасида катта тезликда велосипед йўлагига чиқиб кетган ва у ердаги одамларни босиб кетган. Ҳужум учун масъулиятни «Исломий давлат» (ИД) террорчилик гуруҳи ўз зиммасига олган. 2023 йилда Соипов умрбод қамоқ жазосига ҳукм қилинди.
АҚШ ҳар йили Diversity Visa дастури доирасида 50 000 тагача грин-карта тақдим этади. Associated Press қайд этишича, 2025 йилги лотереяда иштирок этиш учун қарийб 20 миллион киши ариза топширган, ғолибларнинг турмуш ўртоқлари билан бирга 131 мингдан ортиқ номзод танлаб олинган. Танлаб олинган аризачилар сони бўйича Ўзбекистон 5564 киши билан биринчи ўринни эгаллаган эди.
Лотерея ғолиблари грин-карта олиш учун ариза топширишга таклиф қилинади. Улар консулликларда суҳбатдан ўтадилар ва яшаш гувоҳномасини олиш истагида бўлган бошқа номзодлар каби талаблар ва текширувлардан ўтказиладилар.
