Ўзбекистонда Тошкентни бошқариш ёндашувларини қайта кўриб чиқиш ва пойтахт мақоми тўғрисидаги қонунни қабул қилиш режалаштирилмоқда. Бу ҳақда 2025 йил 16 декабрь куни пойтахт ривожланишига бағишланган йиғилишда Президент Шавкат Мирзиёев маълум қилди.
«Пойтахт — давлатнинг сиёсий, маъмурий, иқтисодий ва маданий маркази. Пойтахтни бошқариш, ривожлантириш ва ҳимоя қилиш учун алоҳида ёндашувлар зарур», — деди.
Шу муносабат билан у Тошкент шаҳар кенгашига маҳаллий бюджетга қайтариладиган даромадларнинг режадан ошириб бажарилган қисмининг 20 фоизини туманлар ўртасида тақсимлаш ваколатини беришни таклиф қилди.
Шунингдек, Тошкент шаҳар ҳокими Шавкат Умрзоқов ва туман ҳокимларига маҳаллий кенгашлар билан келишган ҳолда бюджетнинг бўш маблағларини депозитларга жойлаштиришга рухсат бериш режалаштирилмоқда.
Президент Тошкент фаолиятининг ҳуқуқий, иқтисодий ва ташкилий асосларини белгилаб бериши керак бўлган «Ўзбекистон Республикаси пойтахтининг мақоми тўғрисида»ги қонунни қабул қилиш вақти келганини таъкидлади. Таққослаш учун: Қозоғистонда Остона ҳақидаги шунга ўхшаш қонун 2007 йилда қабул қилинган.
У пойтахт «маҳалла еттилиги» фаолияти самарадорлигини оширишда пешқадам бўлиши кераклигини таъкидлади. 2026 йилдан бошлаб Тошкентда янги тизим жорий этилади, унга кўра «маҳалла еттилиги» тўлиқ шаҳар ҳокимлиги тасарруфига ўтади.
Ҳоким ўринбосарларига янги ёндашувлар асосида «еттилик»нинг ҳар бир аъзоси учун самарадорлик кўрсаткичларини (KPI) ишлаб чиқиш, шунингдек, бюрократияни, жумладан, ортиқча ҳисоботларни қисқартириш топширилди.
«„Еттилик“ ҳисобот билан эмас, одамларнинг оғирини енгил қилиш билан шуғулланиши керак», — деди давлат раҳбари.