Американинг Time журнали 2025 йилнинг одами деб сунъий интеллект яратувчиларини тан олди.
«2025 йил сунъий интеллектнинг бутун салоҳияти тўлиқ намоён бўлган ва ортга йўл йўқлиги аниқ бўлган йил бўлди. Фикрловчи машиналар даврини яратганликлари учун; инсониятни ҳайратда қолдириб, ташвишга солганлари учун; ҳозирги ҳолатни ўзгартириб, инсон имкониятлари чегараларини кенгайтирганликлари учун Time 2025 йил одами деб сунъий интеллект меъморларини эълон қилди», — дея хабар берди нашриёт ижтимоий тармоқларда.
Журнал муқовасига Meta раҳбари Марк Цукерберг, AMD бош директори Лиза Су, xAI, SpaceX ва Tesla раҳбари Илон Маск, Nvidia раҳбари Женсен Хуанг, OpenAI раҳбари Сэм Альтман, Google’га тегишли DeepMind СИ-компанияси бош директори Демис Хассабис, Anthropic раҳбари Дарио Амодей ва ImageNet асосчиси Фэй-Фэй Ли расмларини жойлаштирди.
Муқова 1932 йилда Нью-Йоркда олинган машҳур «Осмонўпар бинодаги тушлик» фотосуратига ишора қилади, лекин ишчилар ўрнига кўндаланг тўсинда юқорида номлари келтирилган технологик компаниялар вакиллари ўтирибди.
«Хуанг, … Альтман ва бошқа сунъий интеллект титанлари туфайли инсоният тўлиқ тезликда, тормозларсиз, юқори даражада автоматлаштирилган ва ўта ноаниқ келажак томон шошилмоқда. Буни [Дональд] Трамп сентябрь ойида Буюк Британияда Хуангга кулиб мурожаат қилиб: „Сиз нима қилаётганингизни билмайман. Умид қиламанки, ҳақсиз“, деган сўзлари билан энг яхши ифодалаган бўлса керак», — дея таъкидлади журнал.
Time томонидан эълон қилинган иккинчи муқовада ишчилар билан ўралган «AI» (СИ) ҳарфлари тасвирланган.
2024 йилда Time талқини бўйича йил одами АҚШ президенти Дональд Трамп бўлган эди.
Time журнали 1927 йилдан бери «йил одами»ни танлаб келади. Йил одами деб «яхши ёки ёмон томонга кетаётган йилдаги воқеалар ривожига энг кўп таъсир кўрсатган шахс, шахслар гуруҳи, ғоя ёки ҳатто объект» эълон қилиниши мумкин. Унвон бериш тўғрисидаги қарорни Time муҳаррирлари қабул қилади.