Андижон вилоятининг Шаҳрихон туманида ҳаво ифлосланишини камайтиришга қаратилган рейдлар давомида сомса ёпиладиган тандирлар бузиб ташланди. Бу ҳақда туман ҳокимлиги матбуот хизмати хабар берди. Кейинчалик у бир нечта фотосурат ва видеога эга хабарни ўчириб ташлади.
Хабарда айтилишича, экологик барқарорликни таъминлаш бўйича туну кун рейдлар Андижон вилояти ҳокими Шуҳрат Абдураҳмонов топшириғи билан амалга оширилмоқда.
2025 йил 3 декабрь куни эълон қилинган видеода «Уч ариқ ошхонаси», «Меҳмон ошхонаси» ва «Бек ошхонаси» каби камида учта муассасадаги тандирлар экскаваторлар ёрдамида бузиб ташланганини кўриш мумкин.
Туман ҳокимлиги баёнотида эрта тонгдан ишчи гуруҳи ҳавони ифлослантирувчи объектларни текшираётгани қайд этилган. Талаблар даражасига мос келмайдиган умумий овқатланиш ва хизмат кўрсатиш шохобчаларига нисбатан қатъий чоралар, жумладан, уларнинг фаолиятини вақтинча тўхтатиш чоралари кўрилмоқда.
Кечқурун Андижон вилояти ҳокимлиги «масъулиятсизликка йўл қўйган» Шаҳрихон тумани ҳокими Ҳикматилло Дадахоновга ҳайфсан берилганини маълум қилди. «Келажакда бундай ҳолатларнинг олдини олиш бўйича тушунтириш ишлари олиб борилди», — дейилади хабарда.
Шаҳрихон ҳокимлигининг қўшимча қилишича, рейдлар давомида бозорда жойлашган ошхоналарда санитария-гигиена қоидаларига риоя қилиниши, шунингдек, газ баллонларидан тўғри фойдаланилиши ўрганилмоқда. Текширувлар натижасида баъзи муассасалар муҳрланиб, улардан баллонлар олиб қўйилган.
Ҳаво ифлосланиши манбаларини аниқлаш бўйича кучайтирилган рейдлар Тошкент ва Ўзбекистоннинг бошқа ҳудудларида бошланган. Экология органлари ва ҳуқуқни муҳофаза қилиш тузилмалари вакилларидан иборат ишчи гуруҳлар тозалаш тизимларисиз ишлайдиган иссиқхоналар, шиналарни ёқиш ҳолатлари ва умумий овқатланиш соҳасидаги қоидабузарликларни аниқламоқда. Хусусан, пойтахтда овқат (кабоб ва бошқалар) тутун чиқаргичларсиз тайёрланаётган умумий овқатланиш шохобчалари жавобгарликка тортилмоқда.
Таъкидлаш жоизки, экологик фаоллар ва жамоатчилик мамлакат раҳбариятининг ҳаво сифати билан боғлиқ вазиятни яхшилаш бўйича топшириқларини бажаришда ҳаддан ошиш ҳолатлари бўлиши мумкинлигидан огоҳлантирган эди.
Бундан аввал Президент Администрацияси раҳбари Саида Мирзиёева Тошкент вилояти Қибрай туманидаги кўмирда иситиладиган иссиқхоналардан бирига ташриф буюриб, шундай деган эди: «Тадбиркорлар ўз ҳаракатлари учун жавобгар бўлиши керак ва экологияга зарар етказишни фойда билан оқлаб бўлмайди». Шу билан бирга, у «тадбиркорларга ўз фаолиятини қонуний ва хавфсиз олиб боришга ёрдам бериш, жумладан, субсидиялар бериш орқали ёрдам бериш муҳим»лигини қайд этди.
