Тошкент вилоятида қарийб 250 минг нафар истеъмолчига маиший чиқиндиларни олиб чиқиб кетиш хизматлари учун асоссиз ҳисоблар тақдим этилган. Бу ҳақда Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитасининг матбуот хизмати хабар берди. Қўмита чиқинди йиғиш ва олиб чиқиш билан шуғулланувчи компаниялар фаолиятини текширган.
Қўмита маълумотларига кўра, айрим хонадонлардан чиқиндилар олиб чиқиб кетилмаган, бироқ хизматлар учун ҳисоб-китоблар мунтазам равишда амалга оширилган. Бундан ташқари, кўрсатилган хизматлар даражаси белгиланган талабларга жавоб бермаслик ҳолатлари ҳам қайд этилган.
Текширув натижасида, чиқинди олиб чиқиш билан шуғулланувчи 5 та компания истеъмолчилардан 8,8 миллиард сўмдан ортиқ маблағни ноқонуний олгани аниқланди.
«Истеъмолчилар ҳуқуқларини ҳимоя қилиш тўғрисида»ги қонун талабларини бузганлиги учун қўмита қуйидаги компанияларга нисбатан иш очди:
- Rahnamo Servis;
- Zero-Waste;
- Zangiota Obodon;
- Angren Bunyod Fayz;
- Ohangaron Sanitariya Tozalash.
Компанияларга аниқланган қонунбузарликларни бартараф этиш ва уларнинг такрорланишига йўл қўймаслик тўғрисида кўрсатмалар берилди. Шунингдек, қўмита уларни ҳисобланган тўловларни қайта ҳисоб-китоб қилишга мажбурлади.
2025 йил февраль ойида 1,1 миллион истеъмолчига амалда кўрсатилмаган чиқинди ташиш хизматлари учун ноқонуний равишда 18 миллиард сўм ҳисобланган эди.