Президент Шавкат Мирзиёев 2025 йил 1 декабрь куни Ўзбекистонда экологик барқарорлик, шунингдек, чиқиндиларни қайта ишлаш масалалари муҳокама қилинган йиғилиш ўтказди, дея хабар берди давлат раҳбари матбуот хизмати.
Мамлакат раҳбари масъул идоралар, жумладан, бир ҳафта аввал ташкил этилган Тошкентдаги экологик вазиятни яхшилаш бўйича Махсус комиссия ҳисоботларини тинглади.
Комиссия раҳбари — Президент маслаҳатчиси ва Миллий экология қўмитаси раиси Азиз Абдуҳакимов ҳаво ифлосланиши манбаларини аниқлаш ва уларнинг фаолиятини чеклаш бўйича олиб борилаётган ишлар тўғрисида маълумот тақдим этди. Иссиқхона хўжаликлари, қурилиш майдончалари, автомобиллар ва ноқонуний фаолият юритаётган объектлар текширилмоқда. Барқарорлаштириш чоралари — кўчаларни намлаш, ариқларни тозалаш, фаввораларни ишга тушириш ташкил этилди.
Метеорологик шароитлар туфайли атмосферанинг табиий тозаланиши мураккаблашаётгани қайд этилди. Сўнгги кунларда совуқ антициклоннинг таъсири инверсия ҳодисаларини кучайтирди, бу эса ҳавонинг пастки қатламларида майда заррачалар тўпланишига олиб келмоқда.
Президент экологик вазиятни яхшилаш бўйича чораларни нафақат пойтахтда, балки вилоятларда ҳам давом эттириш, аниқланган қоидабузарликларни тезкорлик билан бартараф этиш ва ҳаво сифатига таъсир этувчи барча омиллар устидан қатъий назоратни таъминлашни топширди.
2025 йил 21 ноябрь куни Тошкентда кўчалар ва дарахтлар суғорилганидан сўнг, бошқа вилоятларда ҳам уларни суғориш бошланди. Вилоятларда ҳам қурилиш майдонлари, корхоналар ва иссиқхона хўжаликларида экология қонунчилигига риоя этилиши бўйича рейдлар кучайтирилди.
Ўзгидромет маълумотларига кўра, 2025 йил 1 декабрь соат 18:00 ҳолатига Тошкент ҳавосидаги РМ2,5 майда дисперс заррачаларининг ўртача суткалик миқдори 208 мкг/м3 ни ташкил этган, бу миллий рухсат этилган нормадан (60 мкг/м3) 3,5 баробар юқори. РМ10 заррачалари миқдори эса 300 мкг/м3 ни ташкил этди, бу суткалик нормага тенг.
Халқаро IQAir сервиси соат 23:00 даги маълумотларга кўра, Тошкентни РМ2,5 нинг ўртача 260 мкг/м3 миқдори билан ҳаво ифлосланиши бўйича дунёда биринчи ўринга қўйди. Бу миллий нормадан 4 баробар ва Жаҳон соғлиқни сақлаш ташкилотининг суткалик тавсиясидан (у 15 мкг/м3 га тенг) 17,3 баробар юқори. Пойтахтнинг Air.Tashkent.uz портали соат 23:00 да PM2,5 қийматини 230,9 мкг/м3 даражасида кўрсатди.