Украина президенти офиси раҳбари Андрей Ермак истеъфога чиқмоқда. Бу ҳақда 2025 йил 28 ноябрь оқшомида президент Владимир Зеленский эълон қилди. Ермакни ишдан бўшатиш тўғрисидаги фармон аллақачон Украина президенти сайтида эълон қилинган.
Зеленский ўз мурожаатида уруш ва тинчлик битимини муҳокама қилиш фонида мамлакатга «ички куч» — ташқи бирлик ва Украинанинг дунё билан муносабатлари асоси зарурлигини таъкидлади. Украина етакчисининг сўзларига кўра, бу куч мавжуд бўлиши учун «Украина ҳимоясидан бошқа нарсага чалғишга ҳеч қандай сабаб бўлмаслиги керак».
«Мен ҳеч кимда Украинага нисбатан ҳеч қандай савол бўлмаслигини хоҳлайман. Шунинг учун бугун навбатдаги ички қарорлар қабул қилинади. Биринчиси. Украина Президенти Офиси қайта юкланади. Офис раҳбари Андрей Ермак истеъфо аризасини ёзди», — деди Украина президенти.
«Мен Андрейга музокаралар йўналишидаги Украина позицияси доим керакли тарзда тақдим этилгани учун миннатдорман. Бу доим ватанпарварлик позицияси бўлган. Лекин мен миш-мишлар ва тахминлар бўлмаслигини хоҳлайман», — дея қўшимча қилди Зеленский.
Унинг сўзларига кўра, президент офисининг янги раҳбари бўйича маслаҳатлашувлар 2025 йил 29 ноябрь куни бўлиб ўтиши режалаштирилган.
Аввалроқ Ермак АҚШнинг янги тинчлик режаси бўйича музокараларда Украина делегациясига бошчилик қилган эди. Энди делегацияга ким раҳбарлик қилиши ҳозирча номаълум.
«Яқинда музокаралар бўлиб ўтади, уларда бизнинг вакилларимиз: Бош штаб бошлиғи, ТИВ вакили, МТХ котиби ва бизнинг разведкамиз қатнашади», — деди Зеленский.
Ермакнинг ўзи истеъфога чиқиш қарори ҳақида ҳозирча изоҳ бермади.
2025 йил 28 ноябрь куни эрталаб Украина Миллий аксилкоррупция бюроси (НАБУ) Ермакнинг уйида тинтув ўтказди. «РБК-Украина» ва Financial Times манбаларига кўра, тинтувлар мамлакатда катта шов-шувга сабаб бўлган Украина энергетикасидаги коррупция ишига тааллуқли бўлиши мумкин. НАБУ эълон қилган ушбу ишда Зеленскийнинг собиқ бизнес ҳамкори, «Квартал-95» ҳаммуассиси Тимур Миндич ва яна бир нечта собиқ юқори мартабали амалдорлар фигурант сифатида қатнашган.
Андрей Ермак 2020 йил февраль ойидан буён Украина президенти офисига раҳбарлик қилиб келаётган эди. У Владимир Зеленскийнинг яқин сафдоши ва Украина сиёсатидаги энг нуфузли шахслардан бири ҳисобланарди.