Бразилия Олий суди 2025 йил 25 ноябрь куни мамлакат собиқ президенти Жаир Болсонару давлат тўнтаришига уриниш иши бўйича қамоқ жазосини ўташни бошлаши кераклиги тўғрисида қарор чиқарди, деб хабар бермоқда Reuters.
Суд бир кун аввал собиқ президентга чиқарилган ҳукмнинг қатъий эканини тасдиқлади ва ноябрь ойи бошида унинг апелляция шикоятини рад этган эди.
27 йил-у уч ой қамоқ жазосига ҳукм қилинган Болсонару жазони мамлакат пойтахти Бразилиадаги Федерал полиция штаб-квартираси ҳудудида ўтайди. У ўтган ҳафта электрон билагузукни пайвандлаш мосламаси ёрдамида ечиб ташлашга уринганидан сўнг ўша ерга олиб келинган.
O Globo нашри ёзишича, сиёсатчи алоҳида ванна хонаси, каравот, стул, шкаф, ёзув столлари, телевизор, мини-музлатгич ва кондиционер мавжуд бўлган 12 квадрат метрли камерада сақланмоқда. Газетанинг таъкидлашича, бундай хона Бразилия қонунчилигида назарда тутилган бўлиб, унга кўра алоҳида имтиёзларга эга бўлган мансабдор шахслар «персонал хонаси» стандартларига мос келадиган камерага эга бўлиш ҳуқуқига эга.
Болсонару 2022 йилги сайловларда мағлуб бўлганидан сўнг давлат тўнтаришини ташкил этишда айбдор деб топилиб, сентябрда судланган эди. Прокуратура версиясига кўра, фитна ҳарбийлар томонидан етарлича қўллаб-қувватланмагани туфайли муваффақиятсизликка учраган. Мамлакатнинг собиқ раҳбари айбини тан олмаган.
Жаир Болсонару 2019 йилдан 2022 йилгача Бразилия президенти бўлган. У сайловларда Лула да Силвадан кичик фарқ билан мағлуб бўлган. Сиёсатчи мағлубиятни тан олмаган, лекин лавозимини тарк этган. 2023 йил январь ойи бошида Болсонару тарафдорлари сайлов натижаларига рози бўлмай, мамлакат пойтахти Бразилиада норозилик намойишлари ва тартибсизликлар уюштирган, жумладан, ҳукумат биноларини эгаллашга уринган.
