АҚШ президенти Дональд Трамп 2025 йил 19 ноябрь куни марҳум молиячи, жинсий жиноятларда айбланган Жеффри Эпштейн иши бўйича барча материалларни Адлия вазирлиги томонидан эълон қилишни мажбурий қилувчи қонунни имзолади, деб хабар беради CNN.
«Трампнинг Адлия вазирлиги 2019 йилда айблов эълон қилган (демократлар эмас!) Жеффри Эпштейн ишончли демократ бўлган, демократ сиёсатчиларга минглаб доллар хайрия қилган ва Демократик партиянинг кўплаб таниқли арбоблари билан яқин алоқада бўлган», — деб ёзди Трамп ўзининг Truth Social ижтимоий тармоғида.
Трампнинг сўзларига кўра, Эпштейн алоқада бўлган таниқли шахслар орасида АҚШнинг собиқ президенти Билл Клинтон, собиқ молия вазири Ларри Саммерс ва LinkedIn асосчиларидан бири Рид Ҳоффман бор.
«Эҳтимол, бу демократлар ва уларнинг Жеффри Эпштейн билан алоқалари ҳақидаги ҳақиқат яқинда очилади, чунки мен Эпштейн ҳужжатларини махфийликдан чиқариш тўғрисидаги қонунни имзоладим!» — дея қўшимча қилди Трамп.
Расман «Эпштейн ҳужжатларининг шаффофлиги тўғрисидаги акт» деб номланган қонун 2025 йил 18 ноябрь куни Вакиллар палатасида 427га қарши 1 овоз билан қабул қилинди. Сенат уни бир овоздан маъқуллаб, ҳужжатни имзолаш учун Трампга юборди.
Қонун Адлия вазирлигини Эпштейнга нисбатан тергов бўйича барча маълумотларни 30 кун ичида очиқлашни мажбурлайди, дея аниқлик киритади BBC News. Бу материалларга жиноий тергов ҳужжатлари, жумладан, жабрланувчилар ва гувоҳлар билан суҳбат стенограммалари, унинг мулкларини тинтув қилиш чоғида олиб қўйилган ашёлар, Адлия вазирлигининг ички ёзишмалари, шунингдек, парвоз ёзувлари ва Эпштейн билан боғлиқ бўлган одамлар ҳамда ташкилотлар ҳақидаги маълумотлар киради.
Шу билан бирга, қонунга кўра, Адлия вазирлиги материалларнинг бир қисмини, агар уларни эълон қилиш шахсий ҳаётга тааллуқли бўлса ёки давом этаётган терговларга оид бўлса, уларга киришни блоклаши мумкин.
Аввалроқ Трамп Эпштейн иши бўйича материалларни эълон қилишга қарши чиққан эди, аммо ўтган ҳафта молиячининг жабрланувчилари ва ўзининг Республикачилар партияси аъзоларининг босимидан сўнг ўз позициясини ўзгартирди. У бу масалада «сиёсий жангда ютқазгани» маълум бўлгач, АҚШ Конгрессини қонунни маъқуллашга чақирди, деб ёзади New York Times.
NYT таъкидлашича, жамоатчиликнинг Эпштейн иши бўйича қўшимча ҳужжатларга бўлган қизиқиши молиячига нисбатан жинсий зўравонлик айбловлари ва унинг бой ва нуфузли шахслар, жумладан Трамп билан яқин алоқалари туфайли кучайган.
Трамп камида 15 йил давомида Эпштейннинг дўсти бўлган, бироқ унинг сўзларига кўра, у Эпштейннинг биринчи ҳибсга олинишидан икки йил олдин, 2000-йилларнинг бошида молиячи билан алоқани тўхтатган. У, шунингдек, Эпштейннинг жиноятларига алоқадорлигини ҳам рад этади. Трампнинг таъкидлашича, Эпштейн АҚШ президентининг Флоридадаги қароргоҳи — Мар-а-Лагодаги спа-салон ходимларини «ўғирлагани» учун у билан жанжаллашган.
2024 йилги президентлик кампанияси давомида Трамп Эпштейн ҳужжатларини ошкор қилишга ваъда берган эди. 2025 йил бошида унинг маъмурияти ҳақиқатан ҳам молиячи иши бўйича минглаб саҳифа ҳужжатларни, асосан парвоз журналларини эълон қилганди. Кейинроқ Адлия вазири – Бош прокурор Пэм Бонди бошқа нашрлар бўлмаслигини айтди.
Жеффри Эпштейн 2019 йил ёзида АҚШда ҳибсга олиниб, вояга етмаганларни жинсий савдога жалб қилиш ва жинсий мақсадларда фойдаланиш учун вояга етмаганларни сотиш мақсадидаги фитнада айбланган. 2008 йилда у вояга етмаган қизни фоҳишаликка жалб қилгани учун аллақачон судланган эди. 2019 йил август ойида судни кутаётган 66 ёшли Эпштейн ўз камерасида ўлик ҳолда топилди; унинг ўлими ўз жонига қасд қилиш деб тан олинди.
