АҚШ президенти Дональд Трамп 2026 йилда мамлакатнинг 11 та шаҳрида бўлиб ўтадиган футбол бўйича жаҳон чемпионати ўйинларига чиптаси бор чет эл фуқароларига виза беришни тезлаштиришини маълум қилди. Бу ҳақда у Оқ уйнинг ЖЧ ташкил этиш бўйича мақсадли гуруҳи йиғилиши якунлари бўйича эълон қилди, деб хабар беради Reuters.
Трампнинг сўзларига кўра, АҚШ Америка визасини олиш учун суҳбатга ёзилиш бўйича махсус тизимни — FIFA Pass’ни ишга туширади. «Бу жаҳон чемпионати чипталари эгаларига… устувор суҳбатга ёзилиш имконини беради», — деди АҚШ президенти.
«Мен лавозимга киришгунимга қадар [Америка] визасини олиш кўпинча бир йил вақт оларди. Аммо АҚШ маъмуриятининг тинимсиз меҳнати туфайли сайёранинг 80 фоиздан ортиғи учун виза кутиш вақти 60 кунга ёки ундан ҳам камроққача қисқарди. Жаҳон чемпионатига боришни истаганларга ҳозироқ ариза топширишни қатъий тавсия қиламан», — дея қўшимча қилди Трамп.
АҚШ Давлат котиби Марко Рубио жаҳон чемпионати чипталари мухлисларга АҚШга кириш визалари берилишини кафолатламаслигини таъкидлади.
«Сизнинг чиптангиз — виза эмас. У АҚШга киришни кафолатламайди. У сизга тезлаштирилган суҳбатни кафолатлайди. Сиз барибир ўша текширувдан ўтишингиз керак. Биз бошқа ҳар қандай аризачи билан бўлганидек, ўша текширувни ўтказамиз. Ягона фарқ шундаки, биз сизни навбатнинг бошига қўямиз», — деди Давлат департаменти раҳбари.
Рубио ҳам, Трамп каби, чемпионатга келишни истаганларни Америка визаси учун имкон қадар тезроқ мурожаат қилишга чақирди. Унинг аниқлик киритишича, суҳбат мурожаатдан сўнг «6-8 ҳафта» ўтгач бўлиб ўтади. «Сўнгги дақиқани кутманг», — дея огоҳлантирди Давлат котиби.
Оқ уйда бўлган ФИФА президенти Жанни Инфантино АҚШдаги ЖЧ ўйинларига 10 миллионгача одам ташриф буюриши мумкинлигини айтди.
BBC News ёзишича, янги ёзилиш қоидалари фуқароларига АҚШга кириш тақиқланган ёки чекланган мамлакатлар чипта эгаларига татбиқ этиладими ёки йўқми, номаълум. 2025 йил июнь ойида Трамп Африка, Лотин Америкаси ва Осиёнинг 19 та давлати фуқароларининг АҚШга киришини тақиқловчи ва чегараловчи фармонни имзолаган эди.
2026 йилги футбол бўйича жаҳон чемпионати 11 июндан 19 июлгача АҚШ, Мексика ва Канадада бўлиб ўтади. Ўзбекистон терма жамоаси ўз тарихида илк бор мундиалда иштирок этади.
