Европа Иттифоқи 2025 йил 23 октябрь куни қабул қилинган 19-санкциялар пакетига ўзбекистонлик тадбиркор Рустам Мўминовни киритди.
Эълон қилинган карточкага кўра, Мўминов Ўзбекистон, Россия ва Буюк Британия фуқаролигига эга.
ЕИ ҳужжатида кўрсатилишича, Мўминов (1965 йилда туғилган) Россия ҳарбий-саноат мажмуасини қўллаб-қувватлаш билан боғлиқ.
Брюссель баҳосига кўра, у пахта целлюлозаси ишлаб чиқарувчи Фарғона кимё заводи (Farg‘ona Kimyo Zavodi) ни назорат қилади, унинг маҳсулотлари Пермь ва Қозон порох заводларига етказиб берилган. Бу материаллар Россия қуролли кучлари учун қурол ишлаб чиқаришда қўлланилиши мумкин эди.
Фарғона кимё заводи ва Raw Materials Cellulose нашрлари «Важные истории», Vlast.Kz ва OCCRP концернининг қўшма суриштирувида, шунингдек, Би-би-си Рус хизматининг суриштирувида ҳам тилга олинган. Материалларда айтилишича, бу икки корхона Россия порох заводларига пахта целлюлозасини ҳам тўғридан-тўғри, ҳам хусусий воситачилар орқали етказиб бермоқда. Журналистларнинг ҳисоб-китобларига кўра, 2022 йилда Россиянинг Украинага кенг кўламли бостириб кириши бошланганидан буён бу етказиб бериш ҳажми бир неча баробар ошган.
Завод ҳақида
Май ойида Украина расмийлари Ўзбекистоннинг учта компаниясига — Mercury Renaissance, Фарғона кимё заводи ва Raw Materials Cellulose’га қарши санкция киритган эди. Бу корхоналарнинг иккитаси шахсий санкциялар остида қолган Ўзбекистон фуқароси Рустам Мўминов билан боғлиқ бўлган.
Ўша пайтда Mercury Renaissance ва унинг шўъба корхонаси Farg‘ona Kimyo Zavodi Рустам Раҳимжонович Мўминовга (60%) ва Шаҳриёр Саҳиёрович Тожиевга (40%) тегишли эди.
Ҳозирги кунда 60% улуши Ольга Юрьевна Шагиевага ўтган, у Aloqainvest, Breegs, Atrium Tashkent, Geo Profi Mombasa Finance, Aloqa Klimkontrol, Visata Group, Fortress Invest, Pod Klyuch, Professional Legion, Excellent Trans Service, Madad Kapital Invest Mikrokredit Tashkiloti, Construction Machinery, Brown Iron каби компанияларда улушларга эгалик қилади. Бу корхоналарнинг баъзилари аввалроқ Мўминовга тегишли бўлган.
Корхона маълумотларига кўра, завод йилига 30 минг тоннагача пахта целлюлозаси ишлаб чиқариш қувватига эга бўлиб, маҳсулотнинг 90% га яқини МДҲ, Туркия, Болгария, Хитой ва Европа мамлакатларига экспорт қилинади.
