Интерактив давлат хизматлари ягона портали (my.gov.uz) орқали қурилиш объектлари учун лойиҳа-смета ҳужжатларини келишиш хизмати жорий этилди. Бу ҳақда платформа матбуот хизмати хабар берди.
Портал орқали Тошкент бўйича лойиҳа-смета ҳужжатларини келишиш учун ариза беришда аризачи қўшимча равишда қуйидаги маълумотларни киритиши керак:
- бинолар сони;
- қаватлар сони;
- қурилиш майдони;
- умумий майдон.
Киритилган маълумотлар «Шаффоф қурилиш» миллий ахборот тизими орқали Тошкентнинг бош режаси билан белгиланган шаҳарсозлик нормалари билан автоматик равишда солиштирилади.
Агар параметрлар Бош режа талабларига мос келса, ариза автоматик равишда кўриб чиқишнинг кейинги босқичига ўтади. Акс ҳолда, ариза рад этилади ва фойдаланувчига бу ҳақда хабарнома юборилади.
Хизмат нархи аввалгидек — 185 400 сўм (базавий ҳисоблаш миқдорининг 0,45 баравари). Аризани кўриб чиқиш 14 иш кунигача давом этади.
Тошкентнинг 2045 йилгача мўлжалланган Бош режаси (биринчи босқич — 2030 йилгача) 2024 йил 24 декабрдаги Ўзбекистон ҳукумати қарори билан тасдиқланган эди.
2025 йил июнь ойида 3 та компания Тошкентда кўп қаватли турар жой мажмуаларини қуриш ташаббуси билан чиққани маълум бўлган эди. Лойиҳалардан бири — «Фотон» заводи ўрнида 53 қаватли минора. Яна бир турар жой мажмуаси собиқ Давлат геология қўмитаси ҳудудида, учинчиси эса Magic City рўпарасидаги йўлнинг нариги томонида қурилиши мумкин. Барча биноларнинг қаватлар сони бош режа параметрларидан ошиб кетади.
Қурилиш ва уй-жой коммунал хизмат кўрсатиш вазирлиги бўлим бошлиғи Азиз Халилов бош режадаги биноларнинг рухсат этилган қаватлар сони аниқ ҳудуднинг сейсмик чидамлилигини ҳисобга олган ҳолда белгиланишини айтган. Лойиҳалар амалга оширилишидан олдин илмий-тадқиқот институтларида мажбурий экспертизадан ўтказилиши керак ва қурилишга рухсатномалар қатъий равишда тасдиқланган бош режага мувофиқ берилади.
