Тошкент ҳокимлиги Транспорт вазирлиги билан ҳамкорликда пойтахт аҳолисига чиқинди ташиш машиналарининг ҳаракатини GPS тизими орқали реал вақт режимида кузатиш имконини берувчи tozapoytaxt.uz («Тоза пойтахт») сайтини ишга туширди.
Бундан ташқари, фуқароларнинг чиқиндилар билан боғлиқ мурожаат ва шикоятларини қабул қилиш энди xalqnazorati.uz платформаси орқали марказлашган ҳолда амалга оширилмоқда.
2026 йил 1 январдан бошлаб чиқиндиларни бошқариш тизими шаффофлиги ва самарадорлигини ошириш бўйича қўшимча чора-тадбирларни жорий этиш режалаштирилган:
- Ҳар бир маҳаллада чиқинди ташиш машиналарининг етиб келиш вақти ва йўналишини онлайн кузатиш имконияти пайдо бўлади;
- Маҳаллаларни чиқинди контейнерлари билан таъминлаш бўйича икки йиллик дастур ишга туширилади;
- Кунлик чиқиндилар ҳажми очиқ онлайн-кириш орқали эълон қилинади;
- Кўрсатилаётган хизматларни фуқаролар томонидан баҳолаш механизми жорий этилади;
- Юридик ташкилотлар билан тузилган шартномаларнинг бажарилиши онлайн-мониторинг орқали назорат қилинади.
Шаҳар маъмурияти бу янгиликлар чиқиндиларни бошқариш тизимининг шаффофлиги, қулайлиги ва самарадорлигини оширишга қаратилганлигини қайд этади.
Чиқиндиларни олиб чиқиш тизимини рақамлаштириш жараёни ва «Тоза пойтахт» платформасининг ишга туширилиши август ойида эълон қилинган эди. Ўшанда тизим Олмазор туманида синовдан ўтказилган ва уни 1 сентябрга қадар пойтахтнинг барча туманларида босқичма-босқич жорий этиш режалаштирилган эди.
Президент фармонига кўра, Ўзбекистонда 2026 йилдан бошлаб санитар тозалаш корхоналари чиқинди тўплаш пунктларига видеокамералар ўрнатиши, шунингдек, чиқинди ташиш машиналарини GPS-трекерлар билан жиҳозлаши керак бўлади.
Бундан ташқари, 2026 йил 1 январдан бошлаб аҳоли ва ташкилотлар қаттиқ маиший чиқиндиларни йиғиш ва олиб чиқиш хизматлари учун тўловларни фақат онлайн тарзда амалга оширишлари мумкин – уйма-уй тўлов йиғиш тўхтатилади.
