Ўзбекистон Президенти Шавкат Мирзиёев 2025 йил 6 ноябрь куни АҚШда General Motors International глобал ижрочи директори Шилпан Амин билан учрашув ўтказди, дея хабар берди давлат раҳбари матбуот хизмати.
Учрашувда томонлар корпорация билан узоқ муддатли ҳамкорликни янада кенгайтириш, автомобилсозлик ва янги технологиялар соҳасида қўшма лойиҳаларни амалга ошириш масалаларини муҳокама қилдилар.
Давлат раҳбари General Motors’нинг Ўзбекистон автомобил саноатини ривожлантириш ва диверсификация қилишдаги муҳим ўрнини қайд этди.
Давлат раҳбари матбуот хизмати маълумотларига кўра, сўнгги 5 йил ичида компания 1,6 миллион дона автомобиль ишлаб чиқарган. Ўзбекистон Chevrolet бренди учун АҚШдан кейинги иккинчи йирик бозорга, Марказий Осиё ва МДҲ бозорларида эса сотув бўйича етакчига айланган.
Томонлар маҳаллийлаштиришни чуқурлаштириш ва ишлаб чиқарилаётган маҳсулотлар турларини кенгайтириш истиқболларини муҳокама қилдилар. Замонавий технологияларни жорий этиш, машинасозликда талаб юқори бўлган бутловчи қисмлар ва хомашё ишлаб чиқаришни ривожлантиришга алоҳида эътибор қаратилди.
Шилпан Амин «Ўзбекистон 24» телеканалига берган интервьюсида Ўзбекистон General Motors учун стратегик жиҳатдан ўта муҳим мамлакат эканини айтди.
«Биз 20 йилдан ортиқ вақт давомида Ўзбекистонда фаолият юритиб келаётганимиздан ва маҳаллий ҳамжамиятнинг бир қисмига айланганимиздан фахрланамиз. Мени мамлакатда Chevrolet русумли автомобилларнинг кенг тарқалгани айниқса хурсанд қилади. Биз Ўзбекистон ва бутун Марказий Осиё билан ҳамкорликни давом эттиришни, ўсиш ва тараққиёт йўлида биргаликда олға боришни интиқлик билан кутамиз. Ўзбекистон ўсиш, ишонч ва имкониятлар маркази сифатида биз учун алоҳида аҳамиятга эга», — деди.
UzAuto Motors’даги ҳолат
Chevrolet автомобиллари UzAuto Motors базасида ишлаб чиқарилади. Сотувлар пасайиши фонида компаниянинг 2025 йил январь-сентябрь ойларидаги тушуми 12,8 фоизга, яъни 5,2 трлн сўмга — 35,4 трлн сўмга (2,93 млрд АҚШ доллари)ча тушган. Соф фойда 3,6 фоизга — 2,66 трлн сўмгача (220 млн АҚШ доллари) камайган.
Шу билан бирга, биринчи ярим йиллик якунларига кўра, соф фойданинг пасайиши 27,5 фоизни ташкил этган, аммо учинчи чоракда (июль-сентябрь) компания молиявий кўрсаткичларини кескин яхшилашга муваффақ бўлган.
2025 йилнинг учинчи чораги якунларига кўра, UzAuto Motors 1,27 трлн сўм соф фойда олган — бу 2024 йилнинг шу даврига нисбатан 426 млрд (+50,7%) сўмга кўп. Бунда тушум 17,2 фоизга — 17,15 трлн сўмдан 14,19 трлн сўмгача камайган. Бироқ таннарх янада кучлироқ пасайган (−21,5%), бу эса ялпи маржани бир йил аввалги 15,3 фоизга нисбатан 19,6 фоизгача ошириш имконини берган.
Молиявий даромадлар 3 баравар — 266 млрд сўмдан 842 млрд сўмгача ўсган, бу асосан ижобий курс фарқлари ҳисобига амалга ошган.
Эътиборли жиҳати, фойда солиғи 23% га, 263 млрд сўмгача қисқарган.
Йиллик ҳисобда Chevrolet’нинг бозордаги расмий улуши 89,4% дан 82,7% гача қисқарган, бу эса сотувларнинг 26 мингтага — 245,1 мингтагача камайиши ҳисобига юз берган. Сотувлар деярли барча моделлар бўйича пасайган: бозор етакчиси Cobalt (-4,2%), Tracker (-12%), Onix (-37,8%).
ADM Jizzakh’нинг улуши 6,5% дан 11,1% гача ўсган, сотувлар эса 19 766 тадан 32 987 тагача ошган. Завод KIA, Chery ва Haval’ни етказиб беради.
BYD 2024 йилдаги 3,8% га нисбатан бозорнинг 5,7% ни эгаллаган, сотувлар 11 580 тадан 16 846 тагача кўпайган.
UzAuto Motors бош директори Янош Ковач аввалроқ стратегияни ўзгартириш кераклигини айтган ва Cobalt’нинг янгиланган версияси, жумладан, саккизта янги моделни ишлаб чиқиш ҳақида хабар берган эди.
Таъкидлаш жоизки, 2025 йил 3 ноябрда UzAuto Motors Chevrolet Cobalt автомобилларининг янги партияси учун контрактацияни якунлади. Компания 2,5 соат ичида ушбу моделдаги 100 мингта автомобиль учун олдиндан буюртма олди. Уларнинг нархи 146,5 млн сўмдан (тахминан 12,1 минг АҚШ доллари) бошланади, яъни корхона 1,2 млрд АҚШ долларлик Cobalt ишлаб чиқариш учун буюртма олган.
