Ўзбекистон Президенти Шавкат Мирзиёев 2025 йил 6 ноябрь куни Вашингтондаги Оқ уйда бўлиб ўтган Марказий Осиё ва АҚШ давлат раҳбарларининг «С5+1» форматидаги саммитида сўзга чиқиб (видео), АҚШ Президенти Дональд Трампнинг Марказий Осиё билан ҳамкорликни ривожлантиришдаги ролини юқори баҳолади. Шунингдек, у Дональд Трамп Россиянинг Украинага қарши урушини тўхтата олишига умид билдирди.
«Биз „С5+1“ форматини қайта ишга туширишдаги шахсий ҳиссангизни юксак қадрлаймиз. Бунгача Америка Қўшма Штатларининг бирорта президенти Марказий Осиёга сиздек муносабатда бўлмаган. Мен шахсан ўзим ва барча ҳамкасбларим сизга миннатдормиз. Биз сизнинг эътиборингизни, муносабатингизни ҳис қиламиз, бу биз учун жуда катта аҳамиятга эга. Бунинг учун сизга катта раҳмат», — деди Шавкат Мирзиёев.
У Дональд Трампнинг халқаро барқарорликни таъминлашга қўшган ҳиссаси Ўзбекистонда эътироф этилганини таъкидлади.
«Мен сизга буни айтганман: Ўзбекистонда сизни тинчлик президенти деб аташади. Сиз жуда кўп ишларни амалга оширдингиз — саккизта урушни тўхтата олдингиз. Ва ишонаманки, Россия ва Украина ўртасидаги урушни фақат сизгина тўхтата оласиз. Биз бундан жуда умидвормиз», — деди Мирзиёев.
Давлат раҳбари: ҳозирги саммит АҚШ Марказий Осиёни асосий ҳамкор сифатида кўраётганини намойиш этади, деб таъкидлади. «Биргаликда биз ишонч ва бунёдкорликка интилишга асосланган келажакни қурмоқдамиз», — деди.
Шавкат Мирзиёев «С5+1» формати доирасида ҳамкорликни мустаҳкамлаш бўйича бир қатор ташаббусларни илгари сурди.
«Марказий Осиё мамлакатларида ротация асосида жойлаштириладиган доимий фаолият юритувчи Котибиятни ташкил этишни таклиф қиламан. Иккинчидан, Инвестициялар ва савдо бўйича Мувофиқлаштирувчи кенгашни таъсис этиш ва давлат тузилмалари ҳамда бизнес ўртасида тизимли мулоқотни таъминлаш. Биз Марказий Осиё инвестициявий шериклигини яратиш ғоясини қўллаб-қувватлаймиз — бу ҳақда келишув 2020 йилдаёқ эришилган эди», — дея қайд этди Президент.
Шавкат Мирзиёев транспорт, энергетика ва коммуникация соҳаларида АҚШ билан қўшма лойиҳаларнинг муҳимлигини таъкидлади.
«Биз „Трамп йўналиши“дан фойдаланган ҳолда Марказий Осиёни Европа билан боғлайдиган транспорт, коммуникация ва энергетика лойиҳаларини амалга ошириш бўйича АҚШ билан изчил ишлашга тайёрмиз», — деди давлат раҳбари.
У Ўзбекистон ва АҚШ ўртасида 34 миллиард долларлик инвестиция дастурини амалга ошириш бўйича 3 йиллик режа ишлаб чиқилганини маълум қилди. «Бу йирик лойиҳалар бўлиб, биз уларни сиз билан Нью-Йоркда ҳам, бугун ҳам муҳокама қилдик».
«Бу саммит — тарихий воқеа ва сизнинг барчамизга бўлган муносабатингиз Марказий Осиёни ҳамда минтақамиз ва АҚШ ўртасидаги шерикликни мустаҳкамлаш йўлидаги катта қўллаб-қувватлашни намойиш этади. „С5+1“ формати амалий ҳамкорликнинг самарали механизмига айланиши керак», — деди Шавкат Мирзиёев.
У навбатдаги саммитни 2026 йилда Самарқандда ўтказишни таклиф қилди.
«Ишончим комилки, жаноб Трамп, сизнинг раҳбарлигингиз остида бу шериклик мустаҳкам бўлади», — дея сўзини якунлади Ўзбекистон Президенти.
