Ўзбекистон ва АҚШ Экспорт-импорт банки қатор соҳалардаги йирик лойиҳаларни молиялаштириш бўйича ҳамкорликни кенгайтиришни мақсад қилган. Бу масала 2025 йил 6 ноябрь куни Вашингтонда Президент Шавкат Мирзиёев ва банк раҳбари Жон Йованович ўртасидаги учрашувда муҳокама қилинди.
Президент матбуот хизмати хабар беришича, гап қўшма дастур асосида энергетика, критик минераллар, транспорт, қишлоқ хўжалиги, IТ ва бошқа устувор йўналишлардаги лойиҳалар ҳақида кетмоқда.
Алоҳида эътибор АҚШ Эксимбанкининг миллий авиапаркни модернизация қилиш ва Boeing самолётларини етказиб беришдаги иштирокига қаратилди.
Шавкат Мирзиёевнинг 2025 йил сентябрь ойидаги аввалги АҚШга ташрифи чоғида Uzbekistan Airways ва Boeing компаниялари 2031 йилдан бошлаб ёки ундан аввалроқ 14 та Boeing 787-9 Dreamliner самолётини етказиб бериш бўйича қатъий шартнома тузган ва яна 8 та шу турдаги ҳаво кемасига опцион келишилган эди. Етказиб бериш 2031 йилдан бошланади. Октябрь ойи охирида президент Ўзбекистондаги авиакомпанияларнинг ҳаво кемалари паркини ҳозирги 105 тадан 180 тагача оширишни назарда тутувчи фармонни имзолаган эди.
Учрашувда узоқ муддатли шериклик режасини ишлаб чиқиш бўйича келишувга эришилди.
Шундан сўнг, Президент иштирокида Ўзбекистон Инвестициялар, саноат ва савдо вазирлиги ҳамда АҚШ Эксимбанки ўртасида қўшма лойиҳаларни молиялаштириш тўғрисидаги битим алмашилди.
Эксимбанк АҚШ ҳукуматининг расмий экспорт-кредит агентлиги бўлиб, Америка компанияларининг ташқи иқтисодий фаолиятини ривожлантиришни қўллаб-қувватлайди ва суғурта, кафолат ҳамда кредит воситаларини тақдим этади.
