2025 йил октябрь ойи якунларига кўра, Ўзбекистонда инфляция 0,6% ни ташкил этди, дея хабар берди Миллий статистика қўмитаси.
2025 йил бошидан буён ўртача нархлар ўсиши 5,7% га етди, йиллик ифодада (2024 йил октябрга нисбатан) эса — 7,8% ни ташкил этди. Таққослаш учун: 2024 йил октябрь ойида бу кўрсаткичлар юқорироқ бўлган — мос равишда 0,8%, 7,7% ва 10,2%.
Йиллик инфляция даражаси 2016 йил май ойидан бери минимал кўрсаткичга (7,7%) тушди. Айни пайтда бу кўрсаткич Марказий банкнинг 2025 йил учун инфляция бўйича прогнозидан (8%) паст.
Озиқ-овқат маҳсулотлари бир ойда ўртача 0,9% га (аввал 1,1% эди), ноозиқ-овқат маҳсулотлари — 0,4% га (0,7%), хизматлар — 0,3% га (0,8%) қимматлашди. Бир йил ичида озиқ-овқат маҳсулотлари 5,9% га, ноозиқ-овқат маҳсулотлари 5,8% га, хизматлар эса 14,4% га қимматлашган.
Озиқ-овқат маҳсулотлари
Озиқ-овқат маҳсулотлари орасида бир ой ичида энг кўп тухум — 4,1% га (бир йилда 0,4% га арзонлашган), суякли мол гўшти — 1,7% га (+24,2%), суяксиз мол гўшти — 1,6% га (25,3%), қўй гўшти — 1,6% га (27,3%) ва сут — 1,2% га (+7,2%) қимматлашган. Ўсимлик ёғлари нархининг ўсиши ўртача 0,8% ни (+26,7%) ташкил этди.
Шу билан бирга, гуруч ва гуруч ёрмаси нархи — 2,5% га (-17,9%), шакар — 3,1% га (-5%) ва парранда гўшти — 1% га (+5,4%) пасайган.
Сабзавотлар орасида энг сезиларли даражада помидор — 61% га (-5,3%), бодринг — 58% га (-17,6%) ва бақлажон — 11% га (-29,9%) қимматлашган.
Шу билан бирга, карам 5,4% га (+24,7%), пиёз — 5,3% га (+18,9%), картошка — 2% га (+17,9%) арзонлашган.
Октябрь ойида бир қатор ҳудудларда маиший чиқиндиларни олиб чиқиш, иссиқ сув таъминоти ва иситиш тарифлари ошди. Республика бўйича бу хизматлар учун инфляция 4,3%, 1,3% ва 2,7% ни ташкил этди. Уй-жойларни таъмирлаш материаллари 0,5% га қимматлашди.
Газ учун тўлов йиллик ифодада 39,2% га, сув таъминоти ва канализация — 35,1% га, электр энергияси — 18,8% га ошди.
Ёқилғи
Бензин нархи бир ойда 1,5% га, йил бошидан эса 7,4% га (бир йилда — 11,7% га) ўсди. Аи-80 маркали бензиннинг бир литри 8400 сўмдан 9700 сўмгача, Аи-92 — 10,5–13,7 минг сўм, Аи-95 ва Аи-98 — 12–18 минг сўм, Аи-100 — 20,5 минг сўмгача турди.
Миллий статистика қўмитаси маълумотларига кўра, Республика бўйича Аи-92 маркали бензин сотуви устунлик қилган, унинг улуши барча сотувларнинг ярмидан кўпини (54,2%) ташкил этган.
Пропан 3,3% га (+18% га арзонлашган), метан — 0,1% га (+30,5%) қимматлашган.
Транспорт нархлари ҳам ошди: поездларда юриш — 2,5% га (+4%), автобусларда — 1,7% га (+22,3%), шаҳарлараро автобусларда — 1,1% га (+11,1%), айни пайтда авиачипталар 3,5% га (-17,3% га арзонлашган).
Ички авиақатновлар нархи 52,4% га, ҳайдовчиларни тайёрлаш курслари — 68,9% га, курьерлик хизматлари ва посилка етказиб бериш — 16,8% га ўсди.
Бошқа тоифалар
Дори воситалари 0,4% га, даволаш хизматлари — 0,2–0,3% га қимматлашди.
Кафе ва ресторан хизматлари нархи 0,5–0,7% га ўсди.
Электрон ўтказмалар учун комиссиялар 2,7% га (+8,7%) ошди, оддий ўтказмалар эса 1,9% га (-4,8%) арзонлашди.
Ҳудудлар бўйича инфляция
Йиллик инфляциянинг энг юқори суръатлари Фарғона (8,6%), Қорақалпоғистон (8,2%) ва Сирдарё вилоятларида (8%) қайд этилди. Тошкентда бу кўрсаткич 7,7% ни ташкил этди, бу Республикадаги ўртача даражага яқин.
